Arshdeep Singh : पाकविरुद्ध सोडलेल्या झेलमुळे ट्रोल; पंजाबचे सर्व नेते अर्षदीपच्या पाठीशी

Arshdeep Singh : आशिया करंडक क्रिकेट स्पर्धेत पाकिस्तानविरुद्ध निर्णायकक्षणी सोपा झेल सोडणारा वेगवान गोलंदाज अर्षदीप सिंग सोशल मीडियावर फारच मोठ्या प्रमाणात ट्रोल होत आहे. राज्यसभेचे खासदार हरभजन सिंग यांच्यासह पंजाबचे अनेक नेते अर्षदीपची पाठराखण करण्यासाठी मैदानात उतरले आहेत.

काल रविवारी झालेल्या सामन्यात पाकिस्तानला विजयासाठी १५ चेंडूंत ३१ धावांची गरज असताना रवी बिश्नोईच्या गोलंदाजीवर आसिफ अलीचा अतिशय सोपा झेल अर्षदीपने सोडला. आसिफने यावेळी खातेही उघडले नव्हते. त्यानंतर त्याने ८ चेंडूंत १६ धावा फटकावून पाकचा विजय सोपा केला.

या चुकीमुळे अर्षदीपवर सोशल मीडियावर मोठ्या प्रमाणात टीका होत आहे. आपचे खासदार राघव चढ्ढा, पंजाबचे माजी मुख्यमंत्री अमरिंदर सिंग, पंजाबचे क्रीडामंत्री गुरमीत सिंग आणि भाजपचे नेते मनजिंदर सिरसा हे सर्व २३ वर्षीय अर्षदीपच्या पाठीशी उभे राहिले आहेत. अर्षदीपबाबत सुरू असलेला हा अतिशय क्षुद्रपणा आहे, असे मत हरभजन सिंग यांनी व्यक्त केले आहे.

अर्षदीपकडे उत्तम गुणवत्ता आहे. भारतीय वेगवान गोलंदाजीचा तो येत्या काळात हुकमी एक्का असेल. अशा प्रकारचा तिरस्कार त्याचे खच्चीकरण करू शकत नाही, असे चढ्ढा यांनी म्हटले आहे. पंजाबचे क्रीडामंत्री गुरमीत सिंग यांनीही अर्षदीप भारतीय वेगवान गोलंदाजीचे भवितव्य असल्याचा उल्लेख केला.