Sultan of Johor Cup साठी भारताच्या ज्युनियर हॉकी संघाचे नेतृत्व अमीरकडे, जाणून घ्या वेळापत्रक आणि संघ

Sultan of Johor Cup 2024: मलेशिया येथे १९ ऑक्टोबरपासून खेळवण्यात येत असलेल्या सुल्तान ऑफ जोहोर हॉकी करंडकासाठी भारतीय ज्युनियर संघाची घोषणा करण्यात आली. हॉकी इंडिया यांच्या वतीने निवडण्यात आलेल्या भारतीय ज्युनियर हॉकी संघाचे नेतृत्व अमीर अली याच्याकडे सोपवण्यात आले आहे, तसेच या संघाचे उपकर्णधारपद रोहित याच्या खांद्यावर असणार आहे.

सुल्तान जोहोर हॉकी करंडक १९ ते २६ ऑक्टोबर या कालावधीत मलेशिया येथे खेळवण्यात येणार आहे. या करंडकासाठी अमीर अली व गुरज्योत सिंग या दोन हॉकीपटूंची निवड भारताच्या ज्युनियर संघामध्ये करण्यात आली आहे.

नुकत्याच पार पडलेल्या आशियाई चॅम्पियन्स करंडकात या दोनही खेळाडूंनी भारताच्या वरिष्ठ संघाचे प्रतिनिधित्व केले होते. भारतीय हॉकी संघाने या स्पर्धेचे जेतेपद राखताना उल्लेखनीय कामगिरी केली.

अमीर अली व गुरज्योत सिंग या दोन्ही खेळाडूंनी या स्पर्धेमध्ये छान कामगिरी केली होती. त्यामुळे सुल्तान जोहोर हॉकी करंडकामध्ये या दोन्ही खेळाडूंकडून मोठ्या अपेक्षा बाळगल्या जात आहेत.

भारतीय ज्युनियर हॉकी संघाचा कर्णधार अमीर अली याप्रसंगी म्हणाला, सुल्तान जोहोर करंडक ही नेहमीच प्रतिष्ठेची स्पर्धा म्हणून ओळखली जात आहे. मलेशिया येथे होणार असलेल्या या स्पर्धेमध्ये सहभागी होण्यासाठी भारतीय हॉकीपटू उत्सुक आहेत.

भारतीय हॉकी संघाच्या लढती

• १९ ऑक्टोबर - जपान

• २० ऑक्टोबर - ग्रेट ब्रिटन

• २२ ऑक्टोबर - मलेशिया

• २३ ऑक्टोबर - ऑस्ट्रेलिया

• २५ ऑक्टोबर - न्यूझीलंड

भारतीय संघ -

• गोलकीपर - बिक्रमजीत सिंग, अली खान

• डिफेंडर - आमिर अली (कर्णधार), तालिम प्रियोवार्ता, शारदानंद तिवारी, सुखविंदर, अनमोल एक्का, रोहित (उपकर्णधार)

• मिडफिल्डर - अंकित पाल, मनमीत सिंग, रोसन कुजूर, मुकेश टोप्पो, चंदन यादव

• फॉरवर्ड - गुरजोत सिंग, सौरभ आनंद कुशवाह, दिलराज सिंग, अर्शदीप सिंग, मोहम्मद कोनैन दाद