Dilip Vengsarkar : विश्वकरंडक स्पर्धेत भारतीय संघ फेव्हरिट ; दिलीप वेंगसरकर यांचा विश्वास

मुंबई : भारतीय संघाची एकूणच क्षमता पाहता येत्या ट्वेन्टी-२० विश्वकरंडक स्पर्धेत आपण फेव्हरिट आहोत, असा विश्वास भारताचे माजी कर्णधार दिलीप वेंगसरकर यांनी व्यक्त केला. क्रीडा पत्रकार संघटनेच्या कार्यक्रमात ते बोलत होते. मुंबई क्रीडा पत्रकार संघटनेच्या वतीने वरिष्ठ क्रीडा पत्रकार- छायाचित्रकारांचा सन्मान आज दिलीप वेंगसकर आणि दिग्गज ॲथलीट एडी सिक्वेरा यांच्या हस्ते करण्यात आला.

यावेळी भारताच्या विश्वकरंडक स्पर्धेतील भवितव्याबाबत वेंगसरकर यांनी आशावाद व्यक्त केले. शुभमन गिल, केएल राहुल आणि रिंकू सिंगसारखे खेळाडू अंतिम १५ संघांत स्थान मिळवू शकत नाही, यावरून मुख्य संघाची ताकद दिसून येते, असे वेंगसरकर म्हणाले.

महेंद्रसिंग धोनीच्या नेतृत्वाखाली भारताने जिंकलेल्या पहिल्या वहिल्या ट्वेन्टी-२० विश्वकरंडक स्पर्धेसाठी निवडण्यात आलेला संघ वेंगसरकर अध्यक्ष असलेल्या निवड समितीने निवडला होता. त्यावेळी आपण कशी खेळाडूंची निवड केली होती, या आठवणींना त्यांनी उजाळा दिला.

यंदाच्या स्पर्धेत भारताचे कोणते खेळाडू महत्त्वाचे असतील, या प्रश्नावर बोलताना वेंगसरकर म्हणाले, मुळात ट्वेन्टी-२० हा प्रकार अनिश्चिततेचा आहे. कोणताही खेळाडू कधीही चमकू शकतो; परंतु एकहाती सामना जिंकून देण्याची क्षमता आपल्या सर्व खेळाडूंमध्ये आहे.

प्रत्येक स्पर्धेप्रमाणे या वेळीही भारत-पाक सामन्याची उत्कंठा आहे; परंतु आतापर्यंतचे वर्चस्व आणि भारतीय संघाची ताकद पाहता आपले वर्चस्व अपेक्षित आहे. माझ्यामते उपांत्य फेरीसाठी भारत, ऑस्ट्रेलिया आणि इंग्लंड हे तीन संघ निश्चित असतील, असेही वेंगसरकर यांनी सांगितले.