नागपूर : बीसीसीआयच्या पॅनलवर असलेले विदर्भाचे क्रिकेट पंच उल्हास गंधे व नितीन पंडीत यांची येत्या २६ मार्चपासून सुरू होत असलेल्या आयपीएलसाठी पंच म्हणून नियुक्ती करण्यात आली आहे.
माजी रणजीपटू असलेले गंधे हे आयपीएलमध्ये सहाव्यादा, तर पंडीत चौथ्यांदा पंच म्हणून काम पाहणार आहेत. आयपीएलमध्ये गंधे एकूण १२ सामन्यांमध्ये पंचगिरी करणार आहेत. यापैकी सात सामन्यांमध्ये ते मैदानावरील पंच, तीन सामन्यांमध्ये तिसरे पंच आणि दोन सामन्यांमध्ये चौथे पंच म्हणून काम पाहणार आहेत. तर पंडीत सहा सामन्यांमध्ये मैदानावरील पंच आणि तेवढ्याच सामन्यांमध्ये चौथे पंच राहणार आहेत.
आतापर्यंत ८० पेक्षा अधिक प्रथमश्रेणी सामन्यांमध्ये पंचगिरी करणारे गंधे यांना देशविदेशातील अनेक राष्ट्रीय व आंतरराष्ट्रीय सामन्यांमध्ये पंचगिरीचा अनुभव आहे. त्यांनी महिलांच्या आंतरराष्ट्रीय सामन्यांसह कसोटी व वनडेमध्ये चौथे पंच म्हणून काम पाहिले आहे. याशिवाय घरगुती दुलीप करंडक, चॅलेंजर ट्रॉफी व देवधर करंडक स्पर्धेतही त्यांनी पंच म्हणून यशस्वीरित्या भूमिका बजावली आहे.
पंडीत यांनीही ७४ टी-२० व प्रथमश्रेणी सामन्यांसह इंग्लंड, न्यूझीलंड व द. आफ्रिका अ संघांच्या सामन्यांमध्ये पंच म्हणून काम पाहिले आहे.
नियुक्तीबद्दल गंधे यांनी बीसीसीआय, विदर्भ क्रिकेट संघटनेसह महालेखाकार प्रवीरकुमार, वरिष्ठ उपमहालेखाकार दिनेश मते व उपमहालेखाकार अक्षय खंडारे यांचे आभार मानले आहे. पंडीत यांनीही बीसीसीआय व व्हीसीएला धन्यवाद दिले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.