BCCIची तिजोरी ओसंडून वाहणार; IPL प्रसारण हक्कासाठी टेंडर प्रक्रिया सुरू

आयपीएल (2023 - 2027) प्रसारण हक्काबाबतच्या निविदा (IPL Media Rights) प्रक्रियेला सुरूवात केल्याची घोषणा बीसीसीआयचे (BCCI) सचिव जय शहा यांनी आज केली. बीसीसीआयने या निविदा प्रक्रियेसाठी ई ऑक्शनची सुविधा देणार आहे. अशी सुविधा आयपीएल इतिहासात पहिल्यांदाच देण्यात येईल. याबाबतची अंतिम प्रक्रिया 12 जून पर्यंत पूर्ण होणार आहे. यंदाच्या प्रसारण हक्क प्रक्रियेतून बीसीसीआयला जवळपास 50 हजार कोटी रूपयांच्या कमाईची अपेक्षा आहे.

जय शहा यांनी आयपीएलच्या प्रसारण हक्काबाबतच्या लिलाव प्रक्रियेची माहिती ट्विट करून दिली. त्यांनी 'दोन नवे संघ, जास्त सामने, जास्त प्रेक्षक, जास्त व्हेन्यू आम्ही टाटा आयपीएल एका वेगळ्याच उंचीवर जाईल अशी अपेक्षा करतोय.' जय शहा पुढे म्हणाले की, 'आम्हाला या प्रक्रियेद्वारे जास्तीजास्त कमाई करता येईल असा अंदाज आहे. याचबरोबर यामुळे गुणवत्तेत देखील जास्तीजास्त वाढ होईल. यामुळे शेवटी भारतीय क्रिकेटलाच मोठा लाभ होणार आहे.'

सध्याच्या घडीला आयपीएलचे भारतात लाईव्ह स्ट्रिमिंग करण्याचे अधिकार फक्त डिस्ने प्लस हॉटस्टारकडे आहेत. आता आयपीएलच्या 15 व्या हंगामापासून सामन्यांची संख्या 60 वरून 74 वर गेली आहे. आयपीएलच्या यंदाच्या हंगामापासून गुजरात आणि लखनौ या दोन नव्या संघांचा समावेश होणार आहे. त्यामुळे आयपीएलचे प्रसारण हक्क मिळवण्यासाठी झी, सोनी, रिलायन्सचे व्हायकॉम 18 ग्रुप यांच्यात चांगलीच रस्सीखेच होण्याची शक्यता आहे.

याचबरोबर बीसीसीआयला आयपीएलच्या डिजीटल स्पेससाठी देखील चांगली टक्कर होण्याची अपेक्षा आहे. यात अॅमेझॉन प्राईम, मेटा आणि यूट्यूब यांच्यात स्पर्धा होण्याची शक्यता आहे. या लिलाव प्रक्रियेसंदर्भातील नियम आणि अटी या इनव्हिटेशन टू टेंडर मध्ये सविस्तर देण्यात आले आहेत. याबाबतचे डॉक्युमेंट इच्छुकांनी बीसीसीआयकडे 25 लाख रूपये ( जीएसटी वेगळा ) भरल्यानंतर मिळणार आहे. ही रक्कम नॉन रिफंडेबल आहे.