न्यूझीलंड क्रिकेट बोर्डाच्या एका निर्णयामुळे पाकिस्तान क्रिकेट पुन्हा संकटात सापडले आहे. 18 वर्षानंतर पाकिस्तान दौऱ्यावर गेलेल्या न्यूझीलंडने सुरक्षिततेचे कारण देत पाकिस्तान विरुद्धचा दौरा आयत्यावेळी रद्द केला. न्यूझीलंड क्रिकेट बोर्डाच्या या निर्णयावर पाकिस्तानचे आजी-माजी खेळाडू नाराजी व्यक्त करत असताना ख्रिस गेलच्या एका ट्विटने सर्वांचे लक्ष वेधून घेतले आहे.
न्यूझीलंडचा 34 सदस्यीय संघ दौरा रद्द करुन पुन्हा मायदेशी परतण्यासाठी शनिवारी रात्रीच पाकिस्तानहून दुबईला पोहचला. यादरम्यान UAE त असलेल्या ख्रिस गेलने एक ट्विट केले. मी पाकिस्तानला चाललोय. माझ्यासोबत कोण कोण येणार? क्रिस गेलने केलेले या ट्विटची सोशल मीडियावर जोरदार चर्चा रंगली असून त्याचे ट्विट चांगलेच व्हायरल होत आहे.
वेस्ट इंडिजमधील कॅरेबियन प्रिमीयर लीगमधील चॅम्पियन संघाचा सदस्य ख्रिस गेल आयपीएल स्पर्धेत सहभागी होण्यासाठी युएईमध्ये दाखल झालाय. पंजाब किंग्जकडून तो मैदानात उतरणार आहे. आपल्या हटके पोस्टने सर्वांचे मनोरंजन करणाऱ्या गेलने मजेशीर अंदाजात पाकिस्तानला जाणार असे म्हटले आहे.
कॅरेबियन लीग स्पर्धेत ब्रावोच्या नेतृत्वाखालील सेंट किट्स आणि नेविस पॅट्रिओट्स संघाने जेतेपद पटकावले होते. याच संघाचा गेल सदस्यही होता. या स्पर्धेत गेलने 9 डावात 165 धावा केल्या होत्या. 42 धावांची त्याने सर्वोच्च खेळी केली होती. पंजाबकडून धमाका करण्यापूर्वी सोशल मीडियावर त्याने हास्य फुलवणारी बॅटिंगच केलीये असे म्हणावे लागेल. न्यूझीलंड संघाने पाकिस्तान विरुद्धचा दौरा रद्द करुन त्यांना टेन्शन दिले असताना गेलने पाकिस्तानची फिरकीच घेतली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
