MI vs CSK, IPL 2024: 'एल क्लासिको'पूर्वी चेन्नई-मुंबईच्या खेळाडूंमध्ये वानखेडेवर दिसला 'दोस्ताना', पाहा Video

MI vs CSK, IPL 2024 Video: इंडियन प्रीमियर लीगमधील 'एल क्लासिको' म्हणून जो सामना ओळखला जातो, तो सामना म्हणजे मुंबई इंडियन्स आणि चेन्नई सुपर किंग्स या दोन संघात होणारा सामना.

आयपीएलच्या 17व्या हंगामात या दोन संघात रविवारी (14 एप्रिल) वानखेडे स्टेडियमवर सामना होणार आहे. त्यामुळे या बहुप्रतिक्षित सामन्याकडे सर्वांचे लक्ष लागून राहिलेले आहे.

या सामन्यासाठी चेन्नई सुपर किंग्स संघबी मुंबईत पोहचला आहे. तसेच दोन्ही संघ या सामन्यापूर्वी कठोर मेहनतही करताना दिसले आहेत. याचदरम्यान दोन्ही संघातील खेळाडू एकमेकांना भेटले. याचा व्हिडिओ चेन्नई सुपर किंग्सने सोशल मीडियावर शेअर केला आहे.

या व्हिडिओमध्ये दिसते की मैदानात एकमेकांविरुद्ध उभे ठाकण्यापूर्वी दोन्ही संघातील खेळाडू वानखेडे स्टेडियमवर आपापल्या सरावादरम्यान एकमेकांशी भेटून चर्चा करत आहेत. तसेच थोडी मस्ती करतानाही दिसत आहेत.

या व्हिडिओमध्ये रोहित शर्मा आणि शार्दुल ठाकूर चर्चा करत आहेत, तर रविंद्र जडेजा आणि तिलक वर्मा हे देखील चर्चेबरोबर थोडी मस्तीही करत आहेत. दोन्ही संघांचे प्रशिक्षकही एकमेकांशी बोलताना या व्हिडिओत दिसले.

दरम्यान, सामन्यापूर्वी दोन्ही संघांच्या खेळाडू आणि सदस्यांमध्ये दिसलेली मैत्री चाहत्यांच्या पसंतीस उतरत आहे. या व्हिडिओवर अनेक कमेंट्सही आल्या आहेत.

नव्या कर्णधारांचे नेतृत्व

दरम्यान आयपीएल 2024 स्पर्धा सुरू होण्यापूर्वी चेन्नई आणि मुंबई या दोन्ही संघांमध्ये नेतृत्वबदल झाले आहेत. चेन्नईचे कर्णधारपद एमएस धोनीने सोडले असून ही जबाबदारी त्याने ऋतुराज गायकवाडच्या खांद्यावर सोपवली आहे.

तसेच मुंबईने रोहितच्या जागेवर हार्दिक पंड्याकडे कर्णधारपद सोपवले आहे. त्यामुळे आता रविवारी ऋतुराज आणि हार्दिक यांच्या नेतृत्वाचाही कस लागणार आहे.

चेन्नई आणि मुंबई या दोन्ही संघात अनेक रोमांचक सामने झाले आहेत. हे दोन्ही संघ आयपीएलमधील सर्वात यशस्वी संघही आहेत. या दोन्ही संघांनी प्रत्येकी 5 वेळा आयपीएलचे विजेतेपद जिंकले आहेत.

दरम्यान, यंदाच्या हंगामात या दोन संघात साखळी फेरीत रविवारी एकमेव सामना होणार आहे. याआधी या दोन संघात 36 सामने खेळवण्यात आले असून चेन्नईने 16 विजय मिळवले आहेत, तर मुंबईने 20 विजय मिळवले आहेत.