लखनौ : लखनौ सुपरजायंटस्‌ व चेन्नई सुपर किंग्स यांच्यामध्ये उद्या आयपीएल साखळी फेरीचा सामना रंगणार आहे. मागील दोन लढतींमध्ये लखनौला पराभवाचा सामना करावा लागला असून चेन्नईने मागील दोन लढतींमध्ये विजय साकारले आहेत. याच पार्श्वभूमीवर आता दोन संघ एकमेकांसमोर उभे ठाकणार आहेत.
मथिशा पथिराना, मुस्तफिजूर रहमान, रवींद्र जडेजा, माहीश तीक्षणा या गोलंदाजांचे आव्हान परतवून लावण्याचे काम यजमान संघ लखनौला करावे लागणार आहे. चेन्नईचा फॉर्ममध्ये असलेला फलंदाज शिवम दुबे व लखनौचा फिरकी गोलंदाज रवी बिश्‍नोई यांच्यामधील लढत आकर्षणाचा केंद्रबिंदू असणार आहे.
लखनौसाठी निकोलस पूरन (२२३ धावा), कर्णधार के. एल. राहुल (२०४ धावा) यांनी धावा उभारल्या आहेत. पूरन याने १६१.५९ च्या सरासरीने धावांची फटकेबाजी केली आहे. तसेच १९ षटकारांचा पाऊसही त्याने पाडला आहे. त्याच्याकडून यापुढेही हीच अपेक्षा असेल, पण राहुलकडून मोठ्या खेळीची आशा असणार आहे. क्विंटोन डी कॉक याने दोन अर्धशतकी साकारल्या, पण त्यानंतर त्याला ठसा उमटवता आलेला नाही.
आयुष बदोनीने एक अर्धशतकासह ११३ धावा केल्या आहेत, पण त्याच्याकडून सामन्याला कलाटणी देणारी खेळी झालेली नाही. मार्कस स्टॉयनिस याला सहा सामन्यांमधून फक्त १२२ धावाच करता आल्या आहेत. त्यामुळे त्यालाही आपला खेळ उंचावण्याची गरज आहे.
लखनौ संघाला यंदाच्या मोसमात मयंक यादवच्या रूपात अव्वल दर्जाचा वेगवान गोलंदाज लाभला आहे, पण दुखापतीमुळे त्याला मागील दोन सामन्यांत खेळता आलेले नाही. बुधवारी त्याने सराव केला. तरीही चेन्नईविरुद्धच्या लढतीत तो लखनौचे प्रतिनिधित्व करील की नाही याबाबत प्रश्‍नचिन्ह कायम आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
