Yash Thakur: धोनीसारखं व्हायचं होतं, पण बनला फास्ट-बॉलर; कोण आहे गुजरातविरुद्ध 5 विकेट्स घेणारा विदर्भाचा 'यश'?

Who is Yash Thakur?: इंडियन प्रीमियर लीग २०२४ स्पर्धेत २१ वा सामना लखनौ सुपर जायंट्स विरुद्ध गुजरात टायटन्स संघात पार पडला. एकाना क्रिकेट स्टेडियमवर झालेल्या या सामन्यात लखनौने ३३ धावांनी विजय मिळवला.

लखनौच्या या विजयात २५ वर्षीय यश ठाकूरने मोलाचा वाटा उचलला. त्याने या सामन्यात ३.५ षटके गोलंदाजी करताना ३० धावा देत ५ विकेट्स घेतल्या. त्यामुळे त्याला सामनावीराचा पुरस्कारही देण्यात आला.

दरम्यान, त्याच्या या कामगिरीमुळे तो चर्चेत आला आहे. यश देशांतर्गत क्रिकेटमध्ये विदर्भ संघाकडून खेळतो. त्याने गेल्या काहीवर्षात विदर्भाकडून शानदार कामगिरी केली असून तो विदर्भाच्या संघातील प्रमुख गोलंदाजांपैकी एक आहे.

वेगवान गोलंदाज असलेल्या यशला क्रिकेटचे आकर्षण वाटले ते २०११ मध्ये. द हिंदूने दिलेल्या वृत्तानुसार यशने एमएस धोनीने वर्ल्डकप जिंकल्यानंतर प्रभावित केले होते. त्यामुळे त्याने यष्टीरक्षणही करायला सुरुवात केली.

मात्र प्रशिक्षक प्रविण हिंगणीकर यांच्या अकादमीत असताना त्यांनीच त्याला गोलंदाजी करताना चुकून पाहिले. त्यानंतर त्यांनी त्याला यष्टीरक्षण सोडून देण्याचा सल्ला दिला. त्यांनी त्याला सांगितले की धोनीला वेगळ्या स्वरुपात फॉलो कर. त्यांचा सल्ला यशने ऐकला आणि विदर्भाच्या संघातीलच उमेश यादवला त्याने आदर्श बनवले.

हळुहळू यशने गोलंदाजीत आपली प्रतिमा दाखवून दिली. त्याने गेल्या काही वर्षात सय्यद मुश्ताक अली टी२० ट्रॉफी आणि विजय हजारे वनडे ट्रॉफी या स्पर्धांमध्येही चांगली कामगिरी केली आहे.

त्याला आयपीएल २०२३ च्या लिलावात लखनौने ४५ लाखांत संघात सामील करून घेतले होते. त्यापूर्वी झालेल्या सय्यद मुश्ताक अली ट्रॉफीमध्ये त्याने विदर्भाकडून सर्वाधिक १५ विकेट्स घेतल्या होत्या, तसेच २०२१ च्या विजय हजारे ट्रॉफी स्पर्धेत १८ विकेट्स घेतल्या होत्या.

नुकत्याच झालेल्या रणजी ट्रॉफी २०२३-२४ स्पर्धेतही विदर्भासाठी यशने चांगली कामगिरी केली. त्याने या स्पर्धेत उपांत्य फेरीत ६ आणि अंतिम फेरीत ६ विकेट्स घेतल्या होत्या.

त्याने त्याच्या कारकिर्दीत २२ प्रथम श्रेणी सामने खेळले असून ६७ विकेट्स घेतल्या आहेत. त्याचबरोबर ३७ लिस्ट ए सामन्यांमध्ये त्याने ५४ विकेट्स घेतल्या आहेत, तर ४९ टी२० सामन्यांत त्याने ७४ विकेट्स घेतल्या आहेत.