29.7M! Cristiano Ronaldo च्या यूट्यूब चॅनेलने वाढवली अनेकांची धडधड; IShowSpeed ची रिॲक्शन Viral

Cristiano Ronaldo YouTube Channel IShowSpeed: जगातील फुटबॉलप्रेमींचा लाडका ख्रिस्तियानो रोनाल्डो याने त्याचं यूट्यूब चॅनेल सुरू केलं आहे. इस्टाग्रामवर एक व्हिडीओ पोस्ट करून रोनाल्डोने ही माहिती दिली आणि अवघ्य ९० मिनिटांत त्याच्या चॅनेलच्या सबस्क्रायबर्सचा आकडा १० मिलियन पार झाला आणि दोन दिवसांत हा आकडा २९.७ मिलियन इतका झाला आहे. त्यामुळे जगभरातील अनेक सेलेब्रिटींची धकधक वाढली आहे. पाच वेळच्या बॅलोन डी ओर पुरस्कार विजेत्या रोनाल्डोची लोकप्रियता जगभरात आहे आणि त्यामुळेच त्याने हा यूट्यूब चॅनेलचा वर्ल्ड रेकॉर्डही नावावर केला आहे.

रोनाल्डोने त्याच्या चॅनेलवर १९ व्हिडीओ अपलोड केले आहेत आणि आताच ते कोट्यवधी व्ह्यूजमध्ये गेले आहेत. त्यामुळे रोनाल्डोच्या 'UR Cristiano' चॅनेलमुळे युट्यूबला फायदाही होणार आणि हात मोकळे करून जास्तीचे पैसेही फुटबॉलपटूला द्यावे लागणार आहेत. रोनाल्टोने २९ मिलियन सबस्क्रायबर्सचा टप्पा पार केल्यानंतर IShowSpeed या प्रसिद्ध यूट्यूब क्रिएटरची रिअॅक्शन व्हायरल झाली आहे.

अमेरिकेचा डॅरेन जेसन वॉटकिन्स ज्युनियर जो यूट्यूबर IShowSpeed नावाने प्रसिद्ध आहे. त्याचे २८,२३७, ४१५ एवढे सबस्क्रायबर आहे. रोनाल्डोने त्याला मागे टाकल्यानंतर स्पीड नाराज दिसला. स्पीड स्वतः ख्रिस्तियानो रोनाल्डोचा सुपर फॅन आहे.

रोनाल्डोचे फेसबूकवर १७० मिलियन, X वर ११२.६ मिलियन आणि इंस्टाग्रामवक ६३६ मिलियन फॉलोअर्स आहेत. यापूर्वी हॅमस्टर कोमबॅट याच्या यूट्यूब चॅनेलने सात दिवसांत १० मिलियन सबस्क्रायबर्सचा टप्पा ओलांडून रेकॉर्ड केला होता. पण, रोनाल्डोने अवघ्या काही मिनिटांतच हा टप्पा ओलांडला.

रोनाल्डोने त्याच्या यूट्यूब चॅनेलवर आतापर्यंत १९ व्हिडीओ पोस्ट केले आहेत. त्यात एका व्हिडीओत त्याने गर्लफ्रेंड जॉर्जिया रॉड्रिग्जसोबत गुपचूप लग्न केल्याचे जाहीर केले. रोनाल्डो आणि जॉर्जिया यांना दोन मुलं आहेत. रोनाल्डोच्या आधीच्या तीन मुलांची ती सावत्र आई आहे. या दोघांची जोडी सोशल मीडियावर धुमाकूळ घालतेय.. एका कंपनीत काम करणाऱ्या जॉर्जियाला पाहता क्षणीच रोनाल्डो प्रेमात पडला होता. अनेक वर्ष एकमेकांना डेट केल्यावर त्यांनी गुपचूप लग्न केलं.