ऑकलंड : ऑस्ट्रेलिया, न्यूझीलंड येथे सुरू असलेल्या महिला विश्‍वकरंडक फुटबॉल स्पर्धेला नवा जेता मिळणार आहे. अमेरिका, जर्मनी व नॉर्वे या तीन माजी विजेत्यानंतर आता जपान या माजी विजेत्या देशाचेही आव्हान संपुष्टात आले.
स्वीडनने उपांत्यपूर्व फेरीच्या लढतीत जपानवर २-१ असा विजय मिळवला आणि अंतिम चारमध्ये प्रवेश केला. आता उपांत्य फेरीत त्यांच्यासमोर स्पेनचे आव्हान असणार आहे. स्पेनने उपांत्यपूर्व फेरीच्या लढतीत नेदरलँड संघावर २-१ असा विजय साकारला व आगेकूच केली.
जपानने २०११ मध्ये या स्पर्धेच्या जेतेपदावर मोहोर उमटवली होती. तसेच २०१५ मध्ये त्यांना उपविजेतेपदावर समाधान मानावे लागले. यंदाच्या स्पर्धेमध्येही त्यांनी साखळी फेरीत घवघवीत यश संपादन केले. अंतिम १६ फेरीच्या लढतीत जपानने नॉर्वेवर ३-१ अशी मात केली. या सर्व लढतींमध्ये पहिला गोल जपानकडूनच करण्यात आला होता.
जपानला मात्र स्वीडनविरुद्धच्या लढतीत प्रतिमेला साजेशी कामगिरी करता आली नाही. अमांडा इस्टेड हिने ३२ व्या मिनिटाला स्वीडनसाठी पहिला गोल केला. जपान प्रतिष्ठेच्या स्पर्धेमध्ये पहिल्यांदाच मागे राहिला. फिलीप्पा अँजेलदाल हिने ५१ व्या मिनिटाला पेनल्टीवर गोल केला. जपानकडून ८७ व्या मिनिटाला गोल करण्यात आला. होनोका हयाशी हिने हा गोल केला.
१३ वर्षांमध्ये तिसऱ्यांदा अंतिम चारमध्ये
स्वीडनच्या महिला फुटबॉल संघाने २०११ पासून आयोजित करण्यात आलेल्या विश्‍वकरंडकात ठसा उमटवला आहे. २०११, २०१९ या दोन वर्षांमध्ये झालेल्या विश्‍वकरंडकात स्वीडनने अंतिम चारमध्ये प्रवेश केला होता. आता २०२३ मध्येही त्यांनी याची पुनरावृत्ती केली. स्वीडनला २०११ व २०१९ मध्ये तिसऱ्या स्थानावर समाधान मानावे लागले होते.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.