ICC Player Rankings : आयसीसीच्या जून महिन्यातील बुमरा, मानधना ठरले सर्वोत्तम खेळाडू

दुबई : ट्वेन्टी-२० विश्वकरंडक स्पर्धेचा हिरो जसप्रीत बुमरा आणि सातत्यपूर्ण कामगिरी करत असलेली स्मृती मानधना आयसीसीच्या जून महिन्यातील आयसीसीचे सर्वोत्तम पुरुष आणि महिला खेळाडू ठरले.

भारतीय क्रिकेटसाठी हे दुहेरी यश आहे. असा सन्मान क्वचितच एका देशाला मिळाला आहे. बुमराला या अगोदरही हा मान मिळालेला आहे, स्मृती मानधना मात्र पहिल्यांदा आयसीसीच्या या मासिक पुरस्काराची मानकरी ठरली आहे. गेल्या महिन्यात झालेल्या दक्षिण आफ्रिकेविरुद्धच्या एकदिवसीय मालिकेत सलग दोन शतके करणाऱ्या स्मृतीचे तिसऱ्या सामन्यातीलही शतक थोडक्यात हुकले होते.

बुमराने ट्वेन्टी-२० विश्वकरंडक कमालीची गाजवली. १५ विकेट मिळवणारा बुमरा स्पर्धेतील सर्वोत्तम खेळाडू ठरला. आयसीसीकडून हा सन्मान मिळाल्याबद्दल मी आनंदी आहे. वेस्ट इंडीजमधील अभूतपूर्व यशानंतर हा सन्मान द्विगुणीत करणारा आहे, अशी भावना बुमराने व्यक्त केली. असाच आनंद मानधनानेही व्यक्त केला. या कामगिरीत सातत्य राखण्याचाही विश्वास तिने बोलून दाखवला.