Kapil Dev Dance : 'गुलाबी आँखे जो तेरी देखी...' कपिल देव यांचा पत्नी रोमीसोबत 'रोमँटिक' डान्स

Viral Video : भारतीय क्रिकेट संघाचे माजी कर्णधार कपिल देव हे नेहमीच त्यांच्या हटके स्टाईल आणि वक्तव्यासाठी ओळखले जातात. गेल्या तीन दशकांहून अधिक काळ भारतीय क्रिकेट संघात महत्वाची कामगिरी पार पाडणाऱ्या कपिल देव यांचा पत्नी रोमीसोबतचा तो व्हिडिओ चर्चेत आला आहे.

कपिल देव हे जसे त्यांच्या भेदक गोलंदाजी आणि स्फोटक फलंदाजीसाठी ओळखले जातात तसेच ते त्यांच्या दिलखुलास अंदाजासाठीही परिचित आहेत. सोशल मीडियावर कपिल देव यांचा पत्नी रोमीसोबत गुलाबी ऑखे जो तेरी देखी....या गाण्यावरील डान्स चाहत्यांची दाद मिळवून गेला आहे. नेटकऱ्यांनी तो डान्स पाहिल्यावर दिलेल्या प्रतिक्रिया भलत्याच भन्नाट आहे. क्रिकेटच्या मैदानावर आपल्या कामगिरीनं अचाट पराक्रम करणाऱ्या कपिल यांचा तो अंदाज चाहत्यांना अवाक् करुन गेला आहे.

सोशल मीडियावरील त्या व्हिडिओनं नेटकऱ्यांना जिंकून घेतले आहे. एकानं तर कपिल देव यांच्या डान्सची तुलना बॉलीवूडमधील दिग्गज अभिनेत्यांशी केली आहे. कपिलजी तुमचा हा अंदाज आम्हाला माहिती नव्हता. मोठ्या उत्साहानं आणि तितक्याच उर्जेनं तुम्ही डान्स केला जो आम्हाला खूपच आवडला. तुम्हाला खूप साऱ्या शुभेच्छा अशा शब्दांत नेटकऱ्यांनी कपिल देव यांचं कौतुक केलं आहे.

निमित्तं होतं कपिल देव यांच्या ६५ व्या जन्मदिनाचे. सहा जानेवारी रोजी मोठ्या उत्साहात त्यांचा जन्मदिन साजरा करण्यात आला. या दिवशी देशभरातून त्यांच्या लाखो चाहत्यांनी कपिल देव यांना शुभेच्छा दिल्या. यानिमित्तानं वेगवेगळ्या प्रतिक्रियाही समोर आल्या आहेत. कपिल यांचा तो गुलाबी अंदाज पाहून नेटकऱ्यांनाही भुरळ पडली आहे. ज्या गोलंदाजानं आपल्या हुकमी गोलंदाजीनं जगभरातील फलंदाजांना नाचवलं त्याला अशा वेगळ्या अंदाजात पाहताना चाहत्यांना कमालीचा आनंद झाला आहे.

कपिल देव यांच्या नेतृत्वाखाली भारतीय संघानं १९८३ मध्ये विश्वकरंडकावर नाव कोरले होते. त्यानंतर भारतीय क्रिकेट संघाचा जगभर दबदबा तयार झाला होता. यानंतर कपिल देव यांनी प्रसिद्ध समालोचक म्हणून देखील आपल्या नावाची वेगळी ओळख तयार केली आहे. १९७८ मध्ये कपिल देव यांनी पाकिस्तानच्या विरुद्ध झालेल्या सामन्यातून डेब्यू केले होते.