माझ्या निवृत्तीनंतर भारतीय संघ खूप मजबूत असेल : मिताली राज

क्वीन्सटाऊन: भारताने न्यूझीलंड विरूद्धचा (India Womens Cricket Team) पाचवा वनडे सामना जिंकून मालिकेची सांगता केली. भारताने न्यूझीलंडवर 6 विकेट्स राखून विजय मिळवला. विजयात भारतीय महिला क्रिकेट संघाची कर्णधार मिताली राजने (Mithali Raj) नाबाद 53 धावांची खेळी करत विजयात मोलाचे योगदान दिले. सामना संपल्यानंतर मिताली राजने 4 मार्चपासून न्यूझलंडमध्ये सुरू होणाऱ्या वनडे वर्ल्डकप संदर्भात एक वक्तव्य केले. ती म्हणाली की मी ज्यावेळी वर्ल्डकप नंतर निवृत्त होईन त्यावेळी भारतीय संघात नवीन प्रतिभाशाली खेळाडू येतील आणि तो आणखी मजबूत होईल. (Mithali Raj says after she retire Indian side will be far stronger)

मिताली राज म्हणाली, 'मी ज्यावेळी या स्पर्धेनंतर निवृत्त होईन त्यावेळी भारतीय संघ येणाऱ्या नव्या प्रतिभाशाली खेळाडूंमुळे चांगलाच मजबूत होईल.' मिताली पुढे म्हणाते, 'गेल्या काही सामन्यात आम्ही आमचा खेळ उंचावला आहे. वर्ल्डकपपूर्वीचा हा चांगला संकेत आहे. मोठ्या स्पर्धेपूर्वी तुमची चांगली तयारी होणे गरजेचे असते. आम्हाला भारतात कोरोनाच्या नव्या ओमिक्रॉन व्हेरियंटमुळे सराव करायची संधी मिळाली नाही.'

पाचव्या सामन्याबाबत बोलताना मिताली म्हणाली, 'खेळपट्टी फलंदाजीला पोषक होती. मात्र आज आम्ही चांगली गोलंदाजी केली. मात्र अजून आम्हाला आमच्या फिल्डिंगवर जास्त काम करायला हवे. न्यूझीलंड क्रिकेट बोर्डाने (New Zealand Cricket Board) दिलेल्या या संधीसाठी त्यांचे आभार.' पाचव्या वनडे सामन्यात भारताने न्यूझीलंडचे 251 धावांचे आव्हान 46 षटकात 4 फलंदाजांच्या मोबदल्यात पार केले. भारताकडून स्मृती मानधनाने (Smriti Mandhana) 71, हरमनप्रीत कौरने 63 तर कर्णधार मिताली राजने नाबाद 53 धावांची खेळी केली.