World Cup Team : भारताच्या संभाव्य चमूत या खेळाडूचा समावेश; तर हा खेळाडू असणार बाहेर

मुंबई - राष्ट्रीय क्रिकेट अकादमीतून तंदुरुस्तीचे प्रमाणपत्र मिळाल्यानंतर के. एल. राहुलचा भारतीय क्रिकेट संघात समावेश करण्यात आला आहे. अखिल भारतीय वरिष्ठ क्रिकेट निवड समितीकडून शनिवारी रात्री एकदिवसीय विश्‍वकरंडकासाठी टीम इंडियाचा संभाव्य चमू निवडण्यात आला.

राहुलची संघात निवड केली असून संजू सॅमसनला संघाबाहेर ठेवण्यात आले आहे. मात्र भारतीय क्रिकेट संघाची अधिकृत घोषणा येत्या मंगळवारी करण्यात येणार आहे. पीटीआय संस्थेद्वारे ही बातमी प्रसिद्ध करण्यात आली आहे. भारतामध्ये पाच ऑक्टोबर ते १९ नोव्हेंबर या दरम्यान एकदिवसीय विश्‍वकरंडकाचा थरार रंगणार आहे.

आयसीसीकडून विश्‍वकरंडकासाठी संभाव्य संघ जाहीर करण्यास पाच सप्टेंबरची मुदत देण्यात आली आहे, पण त्याआधीच निवड समितीकडून भारतीय संघनिवड करण्यात आली आहे. निवड समिती प्रमुख अजित आगरकर हे शनिवारी श्रीलंकेत पोहोचले. तेथे त्यांनी कर्णधार रोहित शर्मा व मुख्य प्रशिक्षक राहुल द्रविड यांच्याशी चर्चा करून संघनिवडीवर शिक्कामोर्तब केले.

भारताचा संभाव्य संघ - रोहित शर्मा (कर्णधार), हार्दिक पंड्या (उपकर्णधार), शुभमन गिल, विराट कोहली, श्रेयस अय्यर, के. एल. राहुल, रवींद्र जडेजा, शार्दुल ठाकूर, जसप्रीत बुमरा, मोहम्मद सिराज, कुलदीप यादव, मोहम्मद शमी, अक्षर पटेल, ईशान किशन, सूर्यकुमार यादव.

सूर्यकुमारला संधी

सूर्यकुमारला वनडेमध्ये ठसा उमटवता आला नसला तरी त्याला संधी देण्यात आली आहे. रोहित, शुभमन गिल, विराट कोहली, श्रेयस अय्यर, सूर्यकुमार हे फलंदाजीची धुरा सांभाळतील. या संघात रोहित, श्रेयस, सूर्यकुमार व शार्दुल ठाकूर हे चार खेळाडू मुंबईचे आहेत.

प्रसिद्ध कृष्णाला डावलले

भारतीय संघात मोहम्मद शमी, मोहम्मद सिराज, जसप्रीत बुमरा या वेगवान गोलंदाजांची निवड करण्यात आली आहे. त्यामुळे आशियाई स्पर्धेसाठी निवडण्यात आलेल्या प्रसिद्ध कृष्णाला संधी मिळालेली नाही. हार्दिक पंड्या उपकर्णधाराची भूमिका पार पाडेल. तसेच अष्टपैलू खेळाडू म्हणून हार्दिकसह शार्दुलच्या नावावर शिक्कामोर्तब झाला आहे.