Neeraj Chopra: नदीम पण आमचाच मुलगा...नीरज चोप्राचे सुवर्ण हुकलं, पण आईने दिली मनं जिंकणारी प्रतिक्रिया

नवी दिल्ली- भारताचा स्टार जेवलिन थ्रोअर नीरज चोप्राने पॅरिस ऑलिम्पिकमध्ये विक्रम केला आहे. चोप्राने रौप्य पदक जिंकलं आहे. सलग दोन पदकं जिंकणारा तो दुसरा भारतीय ठरला आहे. नीरज चोप्राला सुवर्ण पदकाची अपेक्षा होती. पण, पाकिस्तानच्या अरशद नदीमने त्याचं हे स्वप्न पूर्ण होऊ दिलं नाही. अरशद नदीमने विक्रमी ९२.९७ मीटर थ्रो करून विक्रम केला आहे.

नीरज याच्या यशानंतर त्याची आई सरोज देवी यांनी आनंद व्यक्त केला आहे. सरोज देवी म्हणाल्यात की सुवर्ण मिळालं नाही याबाबत कसलीही खंत नाही. त्यांनी अरशद नदीम याचे तोंडभरून कौतुक केलं. नीरजने सुवर्ण जिंकलं नसलं तरी नदीम देखील आमचाच मुलगा आहे. त्याने पण खूप कष्ट घेतले होते, असं त्या म्हणाल्या आहेत. त्यांच्या या प्रतिक्रियेने नेटकऱ्यांची मनं जिंकली आहे.

सरोज देवी म्हणाल्या की, 'आज आनंदाचा दिवस आहे. आमच्यासाठी रौप्य पदक सुवर्ण पदकासारखाच आहे. सुवर्ण पदक अरशद नदीमला मिळाले. तो देखील आमचाच मुलगा आहे. त्याने खूप कष्ट घेतले होते. मी नीरजने केलेल्या कामगिरीवर समाधानी आहे. नीरज जेव्हा घरी येईल तेव्हा त्याचे आवडीचे जेवण करेन.' माहितीनुसार, नीरज आणि नदीम हे चांगले मित्र आहेत.

२६ वर्षीय नीरजने पॅरिस ऑलिम्पिकमध्ये ८९.४५ मीटरचा थ्रो केला अन् रौप्य पदकावर आपलं नाव कोरलं. त्याचा दुसरा थ्रोच वैध धरण्यात आला होता. त्याचे इतर पाच प्रयत्न ग्रहित धरण्यात आले नाहीत. विशेष म्हणजे, नीरज चोप्राने टोक्यो ऑलिम्पिकमध्ये ८७.५८ मीटर थ्रो करून सुवर्ण पदक जिंकलं होतं. त्यामुळे यावेळी त्याची कामगिरी चमकदार होती.

पाकिस्तानच्या नदीमने ९२.९७ मीटरचा विक्रमी थ्रो केला. हा नवा ऑलिम्पिक रिकॉर्ड आहे. त्याने थॉर्किल्डसेन एंड्रियास याचा १६ वर्षांचा विक्रम मोडीत काढला आहे. नॉर्वेच्या एंड्रियास याने २००८ च्या ऑलिम्पिकमध्ये ९०.५७ मीटरचा थ्रो केला होता. यावेळी नदीम सर्वांवर भारी पडला. याआधी नीरजने दहा स्पर्धांमध्ये नदीमला हरवलं होतं.