CWG 2022 :'मैदान बदलले, तुमची जिद्द नाही' PM मोदींच्या खेळाडूंना शुभेच्छा

नवी दिल्ली : पंतप्रधान नरेंद्र मोदी (Prime Minister Narendra Modi) यांनी आज (दि. 20 जुलै) व्हिडिओ कॉन्फरन्सद्वारे बर्मिंगहम येथे होणाऱ्या राष्ट्रकुल स्पर्धात (Commonwealth Games 2022) भाग घेणाऱ्या भारतीय खेळाडूंना शुभेच्छा दिल्या. यावेळी त्यांनी खेळाडूंशी संवाद साधताना आपले सर्वस्व पणाला लावून खेळा असे सांगितले. याचबरोबर मोदी चेस ऑलिम्पियाड (Chess Olympiad) आणि राष्ट्रकुल स्पर्धा एकाचवेळी सुरू होणार असल्याने भारतीय खेळाडूंकडे जगावर छाप सोडण्याची संधी असल्याचे म्हणाले. मोदींनी खेळाडूंना सांगितले की वेळेच्या अभावामुळे आपण समोरासमोर भेटू शकत नाही. मात्र ज्यावेळी तुम्ही तेथून परताल त्यावेळी आपण नक्की भेटू.

पंतप्रधान नरेंद्र मोदी व्हिडिओ कॉन्फरन्समध्ये म्हणाले की, 'माझ्यासाठी हा आनंदाचा क्षण आहे की मला तुमच्या सर्वांशी भेटण्याची संधी मिळाली. तुमच्यापैकी अनेक लोक हे विदेशात सराव कर आहे. मी देखील संसद सत्रामध्ये व्यग्र आहे. आज 20 जुलै आहे. क्रीडा जगतासाठी आजचा दिवस खूप महत्वाचा आहे. आज आंतरराष्ट्रीय बुद्धीबळ दिवस आहे. ज्या दिवशी राष्टकुल स्पर्धा सुरू होणार आहे. त्याच दिवशी तामिळ नाडूमध्ये चेस ऑलिम्पियाड सुरू होणार आहे. भारतीय खेळाडूंकडे जगावर आपली छाप सोडण्याची संधी आहे.'

पंतप्रधान पुढे म्हणाले की, 'तुम्ही मन लावून खेळा, सर्वस्व द्या, संपूर्ण शक्तीनिशी खेळा याचबरोबर कोणताही दबाव न घेता खेळा.'

पंतप्रधान नरेंद्र मोदींनी 'आजचा हा काळ भारतीय क्रिकेट इतिहासासाठी एका दृष्टीने सर्वात महत्वाचा आहे. आज तुमच्यासारख्या खेळाडूंचा आत्वविश्वास जबरदस्त आहे. तुमचा सराव देखील चांगला सुरू आहे. देशात खेळाविषयीचे वातावरण देखील जबरदस्त आहे. तुम्ही सगळे शिखरावर पोहचत आहात. नवे विक्रम करत आहात. जे खेळाडू पहिल्यांदा मोठ्या स्पर्धेत भाग घेत आहेत त्यांना मी सांगू इच्छितो की मैदान बदलले आहे. तुमचा अंदाज नाही, तुमची जिद्द नाही. उद्येश एकच आहे तिरंगा फडकवणे, राष्ट्रगीताची धुन ऐकणे. त्यामुळे दबाव घेऊ नका चांगल्या आणि दमदार खेळाने इतरांवर छाप सोडा.'