Prithvi Shaw : नवा ट्विस्ट; क्रिकेटपटू शॉने मद्याच्या नशेत गैरवर्तन केल्याचा पीडितेकडून दावा

नवी दिल्ली - Prithvi Shaw Viral Video: भारतीय क्रिकेटर पृथ्वी शॉ अडचणीत आला आहे. पृथ्वी शॉचा एक व्हिडिओ सोशल मीडियावर मोठ्या प्रमाणात व्हायरल होत आहे. ज्यामध्ये हाणामारी स्पष्टपणे दिसून येत आहे. आता या प्रकरणात नवा ट्विस्ट आला आहे.

क्रिकेटपटू पृथ्वी शॉ मद्यधुंद अवस्थेत होता आणि त्याने आपल्या बॅटने तरुणीला मारहाण केली, असा आरोप तिच्या वकिलाने केला आहे. ओशिवरा पोलिस ठाण्याच्या एका अधिकाऱ्याने सांगितले की, सपना गिल असे अटक करण्यात आलेल्या महिलेचे नाव असून ती सोशल मीडिया इन्फ्लुएंसर आहे. ज्या आठ आरोपींविरोधात गुन्हा दाखल करण्यात आला आहे, त्यापैकी ती एक आहे.

गिलचे वकील अली काशिफ खान देशमुख यांनी एएनआयशी बोलताना आरोप केला की, शॉने महिलेला आपल्या बॅटने मारले. पंचतारांकित हॉटेलमध्ये सोशल मीडिया इन्फ्लुएंसर सपना गिल पृथ्वी शॉसोबत सेल्फी काढण्यासाठी फॅन म्हणून गेली होती. ते पार्टी करत होते, पृथ्वी शॉ मद्यधुंद अवस्थेत होता आणि त्याने हातात बॅट घेतली होती आणि त्याने आपल्या बॅटने सपनाला मारले. त्यानंतर दुसऱ्या दिवशी त्यांनी पोलिसांकडे जाऊन गुन्हा दाखल केला,' असा दावा देशमुख यांनी केला.

या क्रिकेटपटूविरोधात खटला दाखल करणार असल्याचे वकिलांनी सांगितले. आता आम्ही पृथ्वी शॉवर गुन्हा दाखल करू कारण तो मद्यधुंद होता. मद्यधुंद अवस्थेत त्याने गाडीही चालवली आणि त्याने एका दुचाकीलाही धडक दिल्याची माहिती आम्हाला मिळाली. त्याने इंफ्लुएंसर सपनाला बॅटने मारहाण केली. त्याच्यावर कलम ३५४, ५०९, ३३४ अन्वये गुन्हा दाखल करणार आहोत.

सपना आणि पृथ्वीचे एकमेकांशी कोणतेही नाते नाही, ती फक्त त्याच्यासोबत सेल्फी काढण्यासाठी गेली होती. आम्ही इन्फ्लुएंसर जामीन मिळवण्याचा प्रयत्न करत आहोत आणि त्यानंतर आम्ही या क्रिकेटपटूविरोधात एफआयआर दाखल करू. सध्या सपना गिल सध्या अटकेत आहे.