Rahul Dravid Birthday: 'या रिपोर्टरला बाहेर काढा...', जेव्हा राहुल द्रविड पाकिस्तानमध्ये संतापला

Rahul Dravid Birthday : आज भारतीय संघाचा माजी कर्णधार आणि विद्यमान प्रशिक्षक राहुल द्रविडचा वाढदिवस आहे. द वॉल या नावाने प्रसिद्ध असलेला द्रविड 50 वर्षांचा झाला आहे. क्रीडा जगतातील दिग्गजांसह चाहत्यांनीही वेगवेगळ्या प्रकारे अभिनंदन केले आहे. 1973 मध्ये इंदूरमध्ये जन्मलेल्या द्रविडची स्वतःची एक वेगळी शैली आहे आणि तो त्याच्या शांत स्वभावासाठी ओळखला जातो.

पण द्रविडलाही राग येतो हे चाहत्यांना माहीत आहे का? राहुल द्रविडला एकदा पाकिस्तान दौऱ्यावर प्रचंड राग आला होता. हा राग पत्रकार परिषदेदरम्यान आला, जेव्हा द्रविडने एका पत्रकाराला बाहेर काढण्यापर्यंत मजल मारली होती.

ही घटना 2004 मध्ये भारतीय संघासोबत पाकिस्तान दौऱ्यावर घडली होती. त्या कसोटी मालिकेत द्रविडची बॅट जबरदस्त बरसली होती. त्याने 3 सामन्यांच्या 4 डावात 309 धावा केल्या. याच पाकिस्तान दौऱ्यावर झालेल्या पत्रकार परिषदेदरम्यान एका पत्रकाराने मॅच फिक्सिंगबाबत प्रश्न केला होता. यावर टीम इंडियाची भिंत म्हटला जाणारा राहुल द्रविड चांगलाच संतापला. तेव्हा द्रविड जाहीरपणे म्हणाला, 'या रिपोर्टरला कोणीतरी बाहेर काढा. हा मूर्खपणा आहे आणि अशा गोष्टी खेळासाठी वाईट आहेत.

इंग्लंडविरुद्ध आला दुसऱ्यांदा राग

राहुल द्रविडला राग येण्याची ही पहिलीच वेळ आहे, असे नाही. यानंतर 2006 मध्ये एकदा राहुल द्रविड चांगलाच चिडला होता. ही घटना इंग्लंडविरुद्धच्या घरच्या कसोटी मालिकेदरम्यान घडली. त्या मालिकेत द्रविड संघाचा कर्णधार होता. यादरम्यान इंग्लंडविरुद्धच्या मुंबई कसोटीत भारतीय संघाचा पराभव झाला होता. या पराभवामुळे संतप्त झालेल्या द्रविडने ड्रेसिंग रूममध्ये खुर्ची फेकली. खरे तर त्या विजयासह इंग्लंड संघाला तीन कसोटी सामन्यांच्या मालिकेत 1-1 अशी बरोबरी साधता आली. अशा स्थितीत द्रविडला पराभव सहन झाला नाही आणि तो संतापला.

राहुल द्रविडची क्रिकेट कारकीर्द

• 164 कसोटी - 13288 धावा - 36 शतके - 63 अर्धशतके

• 344 वनडे - 10889 धावा - 12 शतके - 83 अर्धशतके

• 1 टी-20 आंतरराष्ट्रीय सामना - 31 धावा