Ranji Trophy 2022 : रणजी ट्रॉफी 2022 तील मुंबई विरूद्ध हैदराबाद सामन्यात पहिल्याच दिवशी नाणेफेक जिंकून प्रथम गोलंदाजी करणाऱ्या हैदराबादची मुंबईच्या फलंदाजांनी चांगलीच धुलाई केली. मुंबईने पहिल्या दिवसाचा खेळ संपला त्यावेळी 90 षटकात 3 बाद 457 धावा ठोकल्या होत्या. मुंबईकडून सलामीवीर यशस्वी जैसवालने 195 चेंडूत 162 धावांची तडाखेबाज खेळी केली.
मात्र तिसऱ्या क्रमांकावर आलेल्या सूर्यकुमार यादवचे अवघ्या 10 धावांनी शतक हुकले. तो नर्व्हस नाईंटीचा शिकार झाला. सूर्या बाद झाल्यानंतर मुंबईचा कर्णधार अजिंक्य रहाणेने 190 चेंडूत 139 धावांची नाबाद खेळी करत मुंबईला 450 च्या पार पोहचवले. दिवसाचा खेळ संपला त्यावेळी अजिंक्य रहाणे 139 धावांवर तर सर्फराज खान 40 धावा करून नाबाद होते. उद्या सामन्याच्या दुसऱ्या दिवशी अजिंक्य रहाणे द्विशतक ठोकतो का याची उत्सुकता असले.
नाणेफेक जिंकून हैदराबादने प्रथम गोलंदाजी करण्याचा निर्णय घेतला. कार्तिकेय काकने 23 धावांवर मुंबईला पहिला धक्का दिला. त्याने पृथ्वी शॉला 19 धावांवर बाद केले. मात्र त्यानंतर आलेल्या सूर्यकुमार यादवने सलामीवीर यशस्वी जैसवालसोबत 153 धावांची दमदार भागीदारी रचली. यात सूर्यकुमारच्या 80 चेंडूत 15 चौकार आणि एका षटकाराच्या सहाय्याने ठोकेल्या 90 धावांचा मोठा वाटा होता. मात्र मेहरोत्राने सूर्याला 90 धावांवर बाद करत ही जोडी फोडली.
सूर्या बाद झाल्यानंतर आलेल्या अजिंक्य रहाणेने मुंबईचा डाव आक्रमकपणे पुढे नेण्यास सुरूवात केली. मुंबईतील बांद्रा कुर्ला कॉम्पेक्स या आपल्या घरच्या मैदानावर अजिंक्य रहाणे पुन्हा लयीत आल्याचे दिसले. त्याने जवळपास 40 षटकात जैसवालसोबत 206 धावांची भागीदारी रचली. दरम्यान, सलामीवीर यशस्वी जैसवालने 195 चेंडूत 162 धावांची दीडशतकी खेळी केली. ही खेळी त्याने 27 चौकार आणि 1 षटकाराने सजवली. मात्र 71 व्या षटकात मेहरोत्राने त्याला बाद करत ही जोडी फोडली.
जैसवाल बाद झाल्यानंतर अजिंक्य रहाणेने डावाची सूत्रे आपल्या हातात घेत संघाला 450 चा टप्पा गाठून दिला. यादरम्यान त्याने आपले शतक देखील पूर्ण केले. अजिंक्य आणि सर्फराजने चौथ्या विकेटसाठी नाबाद 75 धावांची भागीदारी रचत मुंबईला दिवसअखेर 457 धावांपर्यंत पोहचवले.
हेही वाचा : असं एक गाव, जिथं जमिनीला कान लावला तरी संगीत ऐकू येतं...
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
