Ranji Trophy : उशिरा का होईना... कर्णधार अजिंक्य रहाणेची बॅट चमकली! मुंबई पहिल्या स्थानावर कायम

Ranji Trophy Ajinkya Rahane : मुंबई-छत्तीसगड यांच्यामधील रणजी क्रिकेट करंडकातील एलिट ‘ब’ गटातील लढत सोमवारी अनिर्णित राहिली. कर्णधार अजिंक्य रहाणेच्या नाबाद ५६ धावा अखेरच्या दिवसाच्या खेळाचे वैशिष्ट्य ठरल्या. मुंबईच्या संघाचा या गटातून उपांत्यपूर्व फेरीतील प्रवेश पक्का आहे. आता मुंबईचा संघ ३० गुणांसह पहिल्या स्थानावर असून छत्तीसगडचा संघ १३ गुणांसह चौथ्या स्थानावर आहे.

मुंबईच्या संघाने सोमवारी १ बाद ९७ या धावसंख्येवरून पुढे खेळायला सुरुवात केली. मुंबईने ६ बाद २५३ धावांपर्यंत मजल मारली. पृथ्वी शॉ ४५ धावांवर रविवारीच बाद झाला होता. अमोघ भटकळ २४ धावांवर बाद झाला. भूपेन लालवानी याने ५९ धावांची खेळी केली.

सातव्या डावात पहिले अर्धशतक

सुमार फॉर्ममुळे भारताच्या कसोटी संघातून डावलण्यात आलेल्या अजिंक्य रहाणेला यंदाच्या रणजी मोसमातही अपयशाला सामोरे जावे लागत आहे. चार सामन्यांमधून सातव्या डावात त्याला पहिले अर्धशतक साजरे करता आले.

अजिंक्यने १२४ चेंडूंचा सामना करताना ६ चौकार व १ षटकारासह नाबाद ५६ धावांची खेळी साकारली. सूर्यांश शेडगे याने २६ धावांची व शार्दुल ठाकूर याने ३१ धावांची खेळी करीत त्याला साथ दिली. छत्तीसगडकडून अजय मंडल याने ६५ धावा देत मुंबईचा निम्मा संघ गारद केला.

संक्षिप्त धावफलक ः मुंबई- पहिला डाव ३५१ धावा आणि दुसरा डाव ६ बाद २५३ धावा (पृथ्वी शॉ ४५, भूपेन लालवानी ५९, अजिंक्य रहाणे नाबाद ५६, सूर्यांश शेडगे २६, शार्दुल ठाकूर ३१, अजय मंडल ५/६५) छत्तीसगड - पहिला डाव ३५० धावा.