मांजरेकरांनी जडेजाला पुन्हा डिवचले; म्हणे टी 20 वर्ल्ड कप संघात बसतच नाही!

ऑस्ट्रेलियात काही महिन्यात होणाऱ्या टी 20 वर्ल्ड कपसाठी टीम इंडिया संघबांधणीच्या तयारीत लागली आहे. सध्या संघ व्यवस्थापन विविध टीम कॉम्बिनेशन चाचपून पाहत आहे. दरम्यान, भारताचे माजी फलंदाज आणि समालोचक संजय मांजरेकर यांनी रविंद्र जडेजाला पुन्हा डिवचले. त्यांच्या मते रविंद्र जडेजाला टी 20 वर्ल्डकप संघात स्थान मिळणे खूप आवघड आहे. (Sanjay Manjrekar Says Ravindra Jadeja doesn't Fit In T20 World Cup Indian Team)

संजय मांजरेकर म्हणातात की, 'गेल्या काही दिवसांमध्ये दिनेश कार्तिकने दाखवून दिले आहे की तो भारतासाठी 6 किंवा 7 व्या क्रमांकावर चांगल्या प्रकारे फलंदाजी करू शकतो. टी 20 क्रिकेटमध्ये त्याने आपल्या खेळीमुळे सर्वांना प्रभावित केले आहे.'

मांजरेकर पुढे म्हणाले की, 'रविंद्र जडेजा सारख्या अष्टपैलू खेळाडूला आता टी 20 संघात स्थान मिळवणे कठिण झाले आहे. अक्षर पटेल सारखा खेळाडू जडेजाच्या पुढे चालला आहे. संघात हार्दिक पांड्या देखील परत आला आहे. दिनेश कार्तिक देखील आहे. याचबरोबर मधल्या फळीत ऋषभ पंत देखील आहे. रविंद्र जडेजाबाबत बोलायचे झाले तर त्याला संघात सहजासहजी जागी मिळणार नाही.'

जडेजाचा खराब आयपीएल हंगाम

गेले काही दिवस रविंद्र जडेजासाठी फारसे चांगले गेलेले नाहीत. आयपीएलमध्ये त्याला सीएसकेचा कर्णधार करण्यात आले. मात्र त्याची कामगिरी सर्वसाधारण होती. एक अष्टपैलू म्हणून देखील त्याला आपली छाप पाडता आली नाही. त्यानंतर दुखापतीमुळे तो संघातून बाहेर गेला. आता इंग्लंड दौऱ्यावर त्याच्याकडून बऱ्याच अपेक्षा केल्या जात आहेत.

यंदाचा टी 20 वर्ल्ड कप ऑक्टोबर - नोव्हेंबरमध्ये ऑस्ट्रेलियात होणार आहे. या दरम्यान, भारतीय संघ अनेक टी 20 मालिका खेळणार आहे. वर्ल्ड कपसाठीचा संघ कसा असेल याची झलक इंग्लंड दौऱ्यावर पहावयास मिळणार आहे. संघात मधल्या फळीत आणि फिनिशरच्या जागेवर चांगलीच स्पर्धा निर्माण झाली आहे. दिनेश कार्तिकच्या येण्यामुळे ऋषभ पंतची देखील डोकेदुखी वाढली आहे. हार्दिक पांड्या संघात परतल्यामुळे रविंद्र जडेजावर टांगती तलवार आहे.