Asian Games : कष्टाचं झालं चीज! आशियाई क्रीडा स्पर्धेत आदितीचा 'सुवर्णवेध'; देदीप्यमान यशाने आई-वडील भारावले

नागठाणे : चीनमध्ये सुरू असलेल्या आशियाई क्रीडा स्पर्धेत (Asian Games) सातारकर आदिती गोपीचंद स्वामी (Aditi Gopichand Swami) हिने आज देशाला आणखी एक सुवर्णपदक मिळवून दिले. तिरंदाजीतील (Archery) महिला सांघिक विभागात तिने देदीप्यमान यश पटकाविले. या यशामुळे तिचे आई-वडील भारावून गेले आहेत.

आदितीचे वडील गोपीचंद स्वामी यांनी ‘सकाळ’शी बोलताना आपल्या भावनांना वाट करून दिली. गेल्या अनेक दिवसांपासून पाहिलेले स्वप्न आज साकार झाले. जागतिक विक्रमापाठोपाठ देशासाठी तिने बजावलेली ही अतुलनीय कामगिरी आमचा आनंद द्विगुणित करणारी आहे, असे त्यांनी सांगितले.

आदितीसह भारतीय संघ सुवर्णपदक पटकाविणार, याची आम्हा कुटुंबीयांना खात्री होती. मात्र, त्याबरोबरच एक चुकीचा बाणदेखील पदकाला हुलकावणी देऊ शकतो, याचीही जाणीव होती. श्री. स्वामी म्हणाले, ‘‘पहाटे पाच वाजल्यापासून आम्ही सामना पाहण्यासाठी सज्ज होतो. आज एकाच दिवशी उपांत्यपूर्व, उपांत्य अन् अंतिम फेरीचे सामने होते, त्यामुळे मनात काहीशी धाकधूक होती. निकाल काय लागेल, याविषयीही चिंता होती.

ऐनवेळी वातावरणात बदल झाल्यामुळे वाऱ्याचा वेगही वाढला होता. त्यातून खेळाडूंना अचूक नेम साधता येत नव्हता. अशा प्रतिकूल परिस्थितीतही भारतीय संघाने कमालीची जिद्द दाखविली. केवळ एक अंकाच्या फरकाने त्यांनी चिनी तैपेई संघावर विजय मिळविला.’’ गेली तीन वर्षे आदिती तहानभूक विसरून यशासाठी मेहनत घेत होती. तिच्या या कष्टाचे चीज झाले. आई-वडील म्हणून तिच्या या कामगिरीचा अभिमान वाटतो, असे आदितीची आई शैला स्वामी यांनी नमूद केले.

असाही दुग्धशर्करा योग

सातारकर असणारे प्रवीण सावंत हे भारतीय संघाचे प्रशिक्षक. इटलीचे सर्जीओ पेग्नी या परदेशी प्रशिक्षकांसोबत सध्या ते भारतीय संघासोबत आहेत. त्यांच्यासाठी आज दुग्धशर्करा योग होता. पुरुषांच्या सांघिक विभागात त्यांच्या मार्गदर्शनाखाली सराव करणारा ओजस देवतळे यानेही सुवर्णपदक पटकाविले. कालही त्यांनी मिश्र सांघिक विभागात सुवर्णपदक पटकाविले होते. या यशामुळे सावंत खुश होते. या यशाच्या निमित्ताने साताऱ्याच्या नावाची नोंद क्रीडा इतिहासात झाली. आजचा हा क्षण अभिमानास्पद अन् अविस्मरणीय आहे, असे त्यांनी हांग चौऊ येथून ‘सकाळ’शी बोलताना स्पष्ट केले.