IND vs NZ: झकास बॅटिंग करूनही श्रेयसला लागत नव्हती झोप, कारण...

IND vs NZ 1st Test Day 2 Live Updates : भारतीय संघाने दमदार फलंदाजी केल्यानंतर न्यूझीलंडच्या संघानेही यजमानांना जोरदार प्रत्युत्तर दिलं. टीम इंडियाने श्रेयस अय्यरच्या शतकाच्या जोरावर पहिल्या डावात ३४५ धावा केल्या होत्या. प्रत्युत्तरात न्यूझीलंडच्या फलंदाजांनी दुसऱ्या दिवसाचा खेळ संपेपर्यंत १२९ धावांची भक्कम सलामी दिली. विल यंगने नाबाद ७५ तर टॉम लॅथमने नाबाद ५० धावा करत पाहुण्या संघाला चांगल्या स्थितीत नेले. दिवसाचा खेळ संपल्यानंतर श्रेयस अय्यरने आपल्या भावना व्यक्त केल्या.

"पहिल्या दिवसाच्या डावात जो काही खेळ झाला त्यावर मी खूपच खुश होतो. रात्री मला छान झोप लागेल अशी माझी अपेक्षा होती, पण उलटं घडलं. मला टेन्शनमुळे नीट झोप लागूच शकली नाही. सुनील गावसकर यांनी मला कसोटी कॅप देताना म्हंटलं होतं की फार पुढचा विचार करू नको आणि भूतकाळात काय घडलं यातही अडकून राहू नकोस. वर्तमानात काय घडतंय ते पाहा आणि त्यानुसार निर्णय घे. तोच विचार केला आणि कशीबशी झोप लागली. झोप अर्धवट झाली होती, पण दुसऱ्या दिवशी मैदानात उतरून शतक ठोकलं तेव्हा सगळा ताण निघून गेला", अशी प्रतिक्रिया श्रेयस अय्यरने दिली.

दरम्यान, भारताने पहिल्या डावात ३४५ धावा केल्या. मयंक अग्रवाल (१३), चेतेश्वर पुजारा (२६), अजिंक्य रहाणे (३५), वृद्धिमान साहा (१), रविचंद्रन अश्विन (३८), अक्षर पटेल (३) यांना फलंदाजीत फारशी चमक दाखवता आली नाही. पण, श्रेयस अय्यरने दमदार शतक (१०५) लगावले. त्याला शुबमन गिल (५२) आणि रविंद्र जाडेजा (५०) यांनी चांगली साथ दिली. त्यामुळे भारताला ३४५ धावांपर्यंत मजल मारता आली.