केपटाऊन - दक्षिण आफ्रिकेत कसोटी मालिका जिंकण्याची संधी या वेळीही हुकली असली तरी किमान बरोबरी साधण्यासाठी येत्या बुधवारपासून सुरू होणारा दुसरा आणि अंतिम सामना जिंकणे भारताला अनिवार्य आहे. भारतीय संघ परदेशात कसोटीमध्ये चांगला खेळ करु शकतो हे सिद्ध करण्याची वेळ भारतीय संघावर आली आहे.
नव वर्षाच्या पहिल्या दिवशी भारतीय संघ नव्या उत्साहाने न्यूलँडस् मैदानावर सरावासाठी दाखल झाला. नेटमधील सरावाची एक सुविधा मैदानात मुख्य खेळपट्टी शेजारी केली होती. दुसरी सुविधा मैदानाबाहेर होती. सगळे खेळाडू आळीपाळीने दोनही सुविधांचा वापर करत सविस्तर सराव करताना दिसले.
सराव करत असताना विराट कोहलीशी भेट झाली, तो म्हणाला, गेले काही महिने मी फोन पासून जरा लांब होतो. मैदानावर जसे बरेच काही चालू होते तसेच मैदानाबाहेरही बरेच काही चालू आहे. नवीन वर्षाच्या खूप शुभेच्छा देत विराट पुन्हा सरावाकडे वळला.
...तरीही फलंदाजांची सत्वपरीक्षा
न्यूलँडस् मैदानाची खेळपट्टी दुसर्‍या कसोटी सामन्यासाठी तयार केली जात होती. अपेक्षेइतके गवत खेळपट्टीवर दिसले नाही. म्हणजेच आता हे नक्की आहे की कसोटी सामन्यादरम्यान एकदम हिरवीगार खेळपट्टी नसणार. तरीही खेळपट्टी पहिले दोन दिवस वेगवान गोलंदाजांना मदत करणार आहे अशी खात्री खेळपट्टी तयार करणार्‍या माळ्याने दिली.
पत्रकार परिषदेसाठी टाळाटाळ
पहिल्या कसोटीत फलंदाजी आणि गोलंदाजी दोनही क्षेत्रात मोठे अपयश आल्याने सामन्याचे दोन दिवस अगोदर पत्रकारांशी बोलायला कोणाला पाठवायचे हा प्रश्न होता. के एल राहुल आणि विराट कोहलीने फलंदाजीत आणि जसप्रीत बुमराने गोलंदाजीत थोडी चांगली कामगिरी केली होती.
के. एल. राहुल पहिल्या कसोटी दरम्यान पत्रकारांशी वार्तालाप करून गेला होता पत्रकारांना फलंदाजी किंवा गोलंदाजी प्रशिक्षकांशी बोलण्यात खास रस नव्हता. परिणामी सामन्याच्या दोन दिवस अगोदर भारतीय संघातील कोणीच पत्रकारांशी बोलायला आले नाही.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.