Tanveer Sangha : वडील सिडनीत चालवतात टॅक्सी... मुलाचं ऑस्ट्रेलियाकडून दमदार पदार्पण, कोण आहे तनवीर?

Tanveer Sangha Australia T20I : ऑस्ट्रेलिया आणि दक्षिण आफ्रिका यांच्यात डर्बन येथे पहिला टी 20 सामना झाला. या सामन्यात ऑस्ट्रेलियाकडून तनवीर संघा या लेग स्पिनरने पदार्पण केले. ऑस्ट्रेलियाच्या संघातील अव्वल लेग स्पिनर अॅडम झाम्पा आजारी पडल्याने भारतीय वंशाच्या तनवीर संघाला ऑस्ट्रेलियाकडून पदार्पण करण्याची संधी मिळाली. त्याने 31 धावात 4 विकेट्स घेत पदार्पणाच्या सामन्यातच आपला दम दाखवून दिला.

तनवीर संघा हा इंग्लंडवरून दीर्घ विमान प्रवास करून डर्बन येथे पोहचला होता. बुधवारी तनवीर हा हॉटेलच्या जीममध्ये वर्कआऊट करत असताना त्याला कर्णधार मिचेल मार्शने तो पदार्पण करत असल्याचे सांगितले.

कोण आहे तनवीर संघा?

तनवीरचा जन्म 26 नोव्हेंबर 2001 मध्ये सिडनी येथे झाला. तनवीरने सिडनी येथील ईस्ट हिल्स बॉईज हाय स्कूलमधून आपले शालेय शिक्षण पूर्ण केले. त्याचे वडील जोगा हे जलंदर येथील राहीमपूर गावचे रहिवासी होते.

जोगा हे सिडनीत ट्रक्सी चालवतात, तनवीरची आई अपनीत या अकाऊंटन्ट म्हणून काम करतात. तनवीरने बिग बॅश लीगमध्ये 12 डिसेंबर 2020 मध्ये सिडनी थंडरकडून पदार्पण केले होते. त्याने 2020 मध्ये झालेल्या 19 वर्षाखालील वर्ल्डकपमध्ये सर्वांचे लक्ष वेधून घेतले. त्याने 15 विकेट्स घेतल्या होत्या.

बिग बॅश लीगमधील पदार्पणाच्या हंगामात त्याने दमदार कामगिरी केली होती. या कामगिरीच्या जोरावर त्याची ऑस्ट्रेलिया संघात निवड झाली. त्याची 2021 च्या न्यूझीलंडविरूद्धच्या ट्रान्स - टास्मन टी 20 मालिकेत निवड झाली होती. त्याने याच वर्षी न्यू साऊथ वेल्स कडून शेफिल्ड शिल्डमध्ये प्रथम श्रेणी क्रिकेटमध्ये पदार्पण केले.

तनवीर हा ऑस्ट्रेलियाच्या वरिष्ठ संघात निवड होणारा दुसराच भारतीय मूळ असलेला खेळाडू आहे. यापूर्वी वेगवान गोलंदाज गुरिंदर संधूने 2015 मध्ये दोन वनडे सामने खेळले होते. तनवीरने नुकतेच द हंड्रेड स्पर्धेत भाग घेतला होता. त्याने तीन सामन्यात बर्मिंगहम फोनेक्सचे प्रतिनिधित्वक केले. तनवीरची भारतात होणाऱ्या वनडे वर्ल्डकपसाठीच्या संभाव्य ऑस्ट्रेलियन संघात देखील वर्णी लागली आहे.

(Sports Latest News)