Team India WTC 2023-2025 : ज्या ऑस्ट्रेलियाविरुद्धच्या अंतिम सामन्यात पराभव झाल्यामुळे भारताच्या हातून यावेळीही जागतिक कसोटी अजिंक्यपद हुकले, त्याच ऑस्ट्रेलियाविरुद्ध त्यांच्या देशात भारताला पुढील जागतिक कसोटी मालिका वर्तुळात संघर्ष करावा लागणार आहे.
२०२३ ते २०२५ असा पुढच्या जागतिक कसोटी मालिकेचा कार्यकाळ असणार आहे, याची सुरुवात शुक्रवारपासून इंग्लंड-ऑस्ट्रेलियात होणाऱ्या अॅशेस मालिकेतून होणार आहे. या दोन वर्षांत भारत १९ कसोटी सामने खेळणार आहे.
ऑस्ट्रेलियाविरुद्ध मायदेशात झालेल्या मालिकेत २-१ असा विजय मिळवून भारताने अंतिम फेरी गाठली; परंतु गेल्या आठवड्यात ओव्हल येथे झालेल्या सामन्यात त्याच ऑस्ट्रेलियाकडून भारताचा पराभव झाला. आता पुढच्या दोन वर्षांच्या वर्तुळातील १९ पैकी पाच कसोटी भारताला ऑस्ट्रेलियाविरुद्ध ऑस्ट्रेलियात खेळाव्या लागणार आहे.
ऑस्ट्रेलिया भारताएवढ्याच म्हणजेच १९ कसोटी सामने खेळणार आहे; तर इंग्लंड सर्वाधिक २१ कसोटी सामन्यात सहभागी होईल.
भारत-पाक मालिका नाहीच
भारताबरोबर खेळण्यासाठी पाक क्रिकेट मंडळ सर्व पर्याय पडताळत आहेत. भारतीय संघ पाकमध्ये येत नसेल, तर मालिका इंग्लंडसारख्या देशात नियोजित करावी, अशीही मागणी पाककडून करण्यात आली होती; परंतु आयसीसीने तयार केलेल्या पुढच्या दोन वर्षांच्या कार्यक्रमात भारत-पाक मालिकेचा विचारही करण्यात आलेला नाही. भारतीय संघासाठी नव्या कार्यक्रमाची सुरुवात पुढील महिन्यात होणाऱ्या वेस्ट इंडीज दौऱ्यापासून होत आहे. या दौऱ्यात भारतीय संघ दोन कसोटी सामने खेळणार आहे.
गेल्या दोन स्पर्धांप्रमाणे पुढील स्पर्धेचीही रचना कायम ठेवण्यात आली आहे. नऊ संघ सहभागी होतील आणि प्रत्येकाला तीन मालिका मायदेशात आणि तीन मालिका परदेशात खेळाव्या लागणार आहेत. अंतिम सामना एका सामन्याचाच असेल. गुण आणि टक्केवारीचे गणित अगोदरच्या स्पर्धेप्रमाणेच असेल. विजयासाठी १२ गुण, टाय झाला तर प्रत्येकी सहा आणि सामना अनिर्णित राहिला, तर प्रत्येकी चार गुण मिळतील.
अशा होतील मालिका (२०२३-२५)
इंग्लंड : २१ कसोटी, भारत : १९, ऑस्ट्रेलिया : १९, पाकिस्तान : १४, वेस्ट इंडीज : १३, दक्षिण आफ्रिका : १२, न्यूझीलंड : १४, श्रीलंका : १२, बांगलादेश : १२.
भारताच्या मालिका मायदेशात : (१०)
न्यूझीलंडविरुद्ध : ३
इंग्लंडविरुद्ध : ५
बांगलादेशविरुद्ध : २
परदेशात : (९)
वेस्ट इंडिजविरुद्ध : २
दक्षिण आफ्रिकेविरुद्ध : २
भारत-इंग्लंड- ऑस्ट्रेलियालाच प्राधान्य
इतर संघांच्या मालिका कमीत कमी दोन आणि जास्तीत जास्त तीन सामन्यांच्या असणार आहेत. मात्र भारत-इंग्लंड-ऑस्ट्रेलिया एकमेकांविरुद्ध पाच कसोटी सामन्यांच्या मालिका खेळणार आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
