Sumit Nagal : टेनिसपटू सुमीत नागलची पाच स्थानांची प्रगती; एटीपी क्रमवारीत ६८व्या स्थानावर

नवी दिल्ली ­­: भारताचा पुरुष टेनिसपटू सुमीत नागल याने एटीपी क्रमवारीत पाच स्थानांची प्रगती केली आहे. ७३व्या स्थानावरून तो आता ६८व्या स्थानावर पोहोचला आहे. याआधी ७१व्या स्थानांपर्यंत त्याने प्रगती केली होती. त्यामुळे आता ६८वे स्थान ही त्याची सर्वोत्तम क्रमवारी ठरली आहे.

पॅरिस ऑलिंपिकमधील टेनिस या खेळात पुरुष एकेरीसाठी पात्र ठरणारा सुमीत नागल हा भारताचा एकमेव टेनिसपटू ठरला आहे. त्याच्याकडे ७७९ एटीपी गुण आहेत. सुमीतने ऑस्ट्रेलियन ओपनमध्ये कझाकस्तानच्या ॲलेक्झँडर बुबलिक याला पराभूत केले होते.

तसेच, फ्रेंच ओपन व विम्बल्डन या दोन्ही स्पर्धांमध्येही तो सहभागी झाला होता. या वर्षी जर्मनी येथे झालेल्या चॅलेंजर करंडकात त्याने पुरुष एकेरीच्या जेतेपदावरही मोहर उमटवली. याच वर्षी फेब्रुवारी महिन्यात झालेल्या चेन्नई ओपनमध्येही त्याने यश मिळवले होते.

चौथा भारतीय टेनिसपटू

सुमीत नागल याने ६८वे स्थान पटकावत आणखी एक टप्पा ओलांडला आहे. सर्वोत्तम क्रमवारी मिळवणारा तो भारताचा चौथा खेळाडू ठरला आहे. याआधी विजय अमृतराज यांनी १९८०मध्ये १८वे स्थान पटकावले होते.

रमेश क्रिशनन यांनी १९८५मध्ये २३व्या स्थानांपर्यंत मजल मारली होती. तसेच, २०११मध्ये सोमदेव देववर्मन याने ६२व्या स्थानापर्यंत झेप घेतली होती. शशी मेनन यांनी १९७३मध्ये ७१वे स्थान पटकावले होते. सुमीत यांनी शशी यांना मागे टाकले आहे.