भारत-पाक युद्ध रंगवू नका; गोल्डन बॉय नीरजची देशवासीयांना विनंती

टोकियो ऑलिम्पिक स्पर्धेत भारताला सुवर्ण क्षणाची अनुभूती देणाऱ्या नीरज चोप्राचे (Neeraj Chopra) एक विधान सध्या चर्चेत आहे. एका मुलाखतीमध्ये त्याने पाकिस्तानचा भालाफेकपटू अर्शद नदिमचा (Arshad Nadeem) उल्लेख केला होता. यावरुन सोशल मीडियावर भारत-पाकिस्तान वादाचा मुद्दा रंगवण्यात येत आहे. नीरज चोप्राने यावर नाराजी व्यक्त केलीये. त्याने ट्विटरच्या माध्यमातून यासंदर्भात एक व्हिडिओ शेअर केलाय. माझ्या नावाचा वापर करुन चुकीच्या गोष्टी पसरवू नका, अशी विनंती त्याने देशवासीयांना केलीये.

ऑलिम्पिक गोल्डन बॉय नीरज चोप्राने ट्विटच्या माध्यमातून एक व्हिडिओ शेअर केलाय. यात त्याने म्हटलंय की, मी सर्वांना विनंती करतो की, माझ्या वक्तव्याचा चुकीचा अंजेंडा पुढे नेण्यासाठी वापर करुन नये. खेळाच्या माध्यमातून एकीचा संदेश दिला जातो. खेळातील नियम समजून घ्या. उगाच नको त्या अफवा पसरवू नका.

टोकियो ऑलिम्पिक स्पर्धेत भारतासाठी सुवर्ण पदकाची कमाई करणाऱ्या नीरज चोप्राने एका मुलाखतीमध्ये स्पर्धेदरम्यानचा एक किस्सा शेअर केला होता. अंतिम फेरीतील पहिल्या प्रयत्नात भाला फेकताना गडबड गोंधळ झाल्याचे नीरजने म्हटले होते. ज्यावेळी माझा नंबर आला त्यावेळी भाला मिळत नव्हता. शोधाशोध केल्यानंतर तो पाकिस्तानी खेळाडू अर्शद नदिमच्या हाती असल्याचे लक्षात आले. त्याच्याकडून भाला घेतला आणि मग गडबडीनेच पहिल्या प्रयत्नात भाला फेकला, असे नीरजने म्हटले होते.

नीरजने टाइम्स ऑफ इंडियाला दिलेल्या मुलाखतीनंतर स्पर्धेदरम्यानचा एक व्हिडिओ सोशल मीडियावर तुफान व्हायरल होत आहे. चित्रपट दिग्दर्शक अशोक पंडित यांनी देखील नीरजचा हा व्हिडिओ शेअर केलाय. खेळाच्या मैदानातही पाकिस्तानकडून कट रचला गेला. नीरज चोप्राबाबत घडलेला प्रकार पाकच्या नापाक इराद्याचा भाग होता, अशा प्रतिक्रिया या व्हिडिओवर उमटत आहेत.

मात्र नीरज चोप्राने यावर पडदा टाकला आहे. माझ्या वक्तव्याचा विपर्यास करुन खोट्या गोष्टी पसरवू नका. खेळाकडे चांगल्या भावनेनं पाहायला शिका. खेळ समजून घ्या, असे नीरजने म्हटले आहे.