Virat Kohli Net Worth: किंग कोहलीचा श्रीमंतीत हजार कोटींचा टप्पा पार! 'असे' कमवतो इतके पैसे

भारताचा दिग्गज फलंदाज विराट कोहलीची संपत्ती एक हजार कोटींच्या पुढे गेली आहे. इन्स्टाग्रामवर २५२ मिलीयन फॉलोअर्स असलेल्या कोहलीच्या एकूण संपत्तीबाबत स्टॉक ग्रोने हा खुलासा केला आहे. त्यांच्या रिपोर्टनुसार, भारतीय क्रिकेट संघाच्या माजी कर्णधाराची एकूण संपत्ती १०५० कोटी रुपयांवर गेली आहे. जगातील सर्व क्रिकेटपटूंमध्ये हे सर्वाधिक आहे.

अवघे ३४ वर्ष वय असलेला कोहलीला भारतीय क्रिकेट नियामक मंडळ (बीसीसीआय)ने त्यांच्या कराराच्या यादीत 'ए प्लस' (A+) श्रेणीत ठेवले आहे. त्यामुळे कोहलीली करारानुसार मंडळाकडून वर्षाला सात कोटी रुपये मिळतात. याशिवाय बीसीसीआय त्याला कसोटी खेळण्यासाठी १५ लाख रुपये, एकदिवसीय सामन्यासाठी ६ लाख रुपये आणि टी-२० सामना खेळण्यासाठी ३ लाख रुपये देते.

रॉयल चॅलेंजर्स बेंगलोर (RCB) विराट कोहलीला एका हंगामासाठी १५ कोटी रुपये देते. खेळाव्यतिरिक्त कोहलीकडे अनेक ब्रँड्स आहेत. तसेच त्याने ब्लू ट्राइब, युनिव्हर्सल स्पोर्ट्सबिझ, एमपीएल आणि स्पोर्ट्स कॉन्व्होसह सात स्टार्ट-अपमध्ये गुंतवणूक केली आहे.

जाहिरातींमधून १७५ कोटींची कमाई

विराट कोहली हा जाहिरातदारांचा लाडका आहे. तो १८ हून अधिक ब्रँड्सच्या जाहिराती करतो . विराट प्रत्येक जाहिरात शूटसाठी वर्षाला ७.५० ते १० कोटी रुपये घेतो. या बाबतीत तो बॉलिवूड आणि क्रीडा क्षेत्रात आघाडीवर आहे. अशा ब्रँड एंडोर्समेंटमधून तो सुमारे १७५ कोटी रुपये कमावतो. याशिवाय विराट फुटबॉल, टेनिस आणि कुस्ती संघांचाही मालक आहे.

कोहली सोशल मीडियाचा देखील किंग

सोशल मीडियाबद्दल बोलायचे झाले तर कोहली इंस्टाग्रामवर एका पोस्टसाठी ८.९ कोटी रुपये घेतो. त्याचवेळी, ट्विटरवर तो एका पोस्टसाठी अडीच कोटी रुपये घेतात. विराटची दोन घरे आहेत. मुंबईतील घराची किंमत ३४ कोटी रुपये आणि गुरुग्राममधील घराची किंमत ८० कोटी रुपये आहे. याशिवाय त्याला कारचाही शौक आहे. विराट ३१ कोटी रुपयांच्या लक्झरी कारचाही मालक आहे.