Let's keep going! मुलासाठी नोव्हाक जोकोविच बनणार कोच; निवृत्तीवर भाष्य, पाहा व्हिडिओ

Novak Djokovic on Coaching to his Son: विम्बल्डन २०२४ स्पर्धेत रविवारी (१४ जुलै) २१ वर्षीय कार्लोस अल्काराजने पुरुष एकेरीचे विजेतेपद जिंकले. अंतिम सामन्यात त्याने सातवेळच्या विम्बल्डन विजेत्या नोव्हाक जोकोविचला ६-२, ६-२, ७-६ (७-४) अशा सरळ तीन सेटमध्ये पराभूत केले.

अल्काराजने जोकोविचला सलद दुसऱ्यांला विम्बल्डनच्या अंतिम सामन्यात पराभूत करण्याचा पराक्रम गाजवला. त्याने गेल्यावर्षी देखील जोकोविचला विम्बल्डनच्या अंतिम सामन्यात पराभूत केले होते.

पण असे असले तरी गेल्याच महिन्यात गुडघ्यावर शस्त्रक्रिया झाली असतानाही त्यातून सावरून विम्बल्डनची अंतिम फेरी गाठल्याबद्दल ३७ वर्षीय जोकोविचचेही सध्या कौतुक होत आहे.

दरम्यान, या अंतिम सामन्यानंतर उपविजेता ठरलेला जोकोविच त्याच्या कुटुंबाबद्दल बोलताना भावूक झाला होता. त्याने त्यांचे आभार मानताना त्याची दोन्ही मुलं स्टीफन आणि तारा या दोघांनाही टेनिस आवडत असल्याचे सांगितले.

तसेच त्यानं असंही सांगितलं की त्याच्या मुलाने खरंच जर टेनिस गांभीर्याने खेळायचे ठरवले तर निवृत्तीनंतर त्याचा प्रशिक्षक बनण्याचाही तो विचार करेल.

जोकोविच म्हणाला, 'माझी पत्नी, आय लव्ह यू. मला पाठिंबा देण्यासाठी आणि इथे असण्यासाठी आभार.'

जोकोविच पुढे म्हणाला, 'माझी दोन गोंडस मुलं, माझ्या चेहऱ्यावर रोज हसू आणण्यासाठी तुमचे आभार. प्रत्येकवर्षी त्यांना असं कोर्टवर क्लोझिंग सेरेमनीवेळी पाहाताना माझे डोळे पाणावतात. ते माझे छोटे एजंल आहेत.

'त्यांना आता अधिकाधिक टेनिस आवडायला लागलंय. माझ्या मुलाचा प्रशिक्षक म्हणून पुढे जाण्याचे धाडस आहे की नाही मला माहित नाही. मुला, आयुष्यात खूप चांगल्या गोष्टी करण्यासारख्या आहेत, पण जर तुझी टेनिसच खेळायची इच्छा असेल, तर मी तुझ्यासोबत असेल.'

जोकोविचने आत्तापर्यंत सर्वाधिक २४ वेळा ग्रँडस्लॅम स्पर्धा जिंकल्या आहेत. यातील ७ विजेतीपदं त्याने विम्बल्डनमध्ये मिळवली आहेत. जोकोविचचा मुलगा स्टिफान सध्या १० वर्षांचा आहे. तो अनेकदा जोकोविचबरोबर टेनिस खेळतानाही दिसतो.