चाळीस वर्षापेक्षा कमी वय असेल तर चुकूनही मद्यपान करू नका

मद्यपान आरोग्यासाठी हानिकारक आहे. पण तुम्हाला माहित आहे का की, एका विशिष्ट वयानंतर याचे सेवन केले तर ते फायदेशीर देखील ठरू शकते.मात्र या उलट कमी वयाच्या लोकांनी मद्यपान केल्यास त्याचे परिणामही भोगावे लागू शकतात. होय, नुकत्याच झालेल्या एका संशोधनात ही बाब समोर आली आहे. (alcohol is unhealthy if you are younger than 40 a research report said)

ग्लोबल बर्डन ऑफ डिसीज जगभरातील आजार आणि मृत्यूच्या कारणांचा डेटा तयार करतात आणि नुकत्याच त्यांच्या अभ्यासातून समोर आले आहे. लॅन्सेट या वैद्यकीय जर्नलमध्ये हा अभ्यास प्रकाशित झाला आहे.

चार वर्षांपूर्वीच्या एका अभ्यासात असे म्हटले आहे की, एखादी व्यक्ती अधूनमधून मद्यसेवन करतो, त्यामुळेही जास्त नुकसान होते. पण नुकत्याच समोर आलेल्या अभ्यासात असे म्हटले आहे की, दारूच्या सेवनामुळे वृद्धांपेक्षा तरुणांना जास्त नुकसान होते. ठराविक वयानंतर, जर मर्यादित प्रमाणात सेवन केले तर त्याचा फायदा होऊ शकतो. रेड वाईन मर्यादित प्रमाणात प्यायल्याने हृदयविकार, स्ट्रोक आणि मधुमेह यांसारख्या आजारांचा धोका कमी होऊ शकतो, असे या अभ्यासात म्हटले आहे.

युनिव्हर्सिटी ऑफ वॉशिंग्टन स्कूल ऑफ मेडिसिनच्या प्रोफेसरडॉ इमैनुएला गाकिडौ यांच्या मते, मद्यपान करताना वय खूप महत्त्वाचे असते. या अहवालानुसात 15 ते 39 वर्षे वयोगटातील मद्यपान करणाऱ्यांना अधिक नुकसान होण्याची शक्यता असते. तर 40 वर्षांपेक्षा जास्त वयाच्या किंवा वृद्धांनी कमी प्रमाणात सेवन केल्यास त्यांना फायदा होऊ शकतो.

2020 मध्ये 204 देशांतील एकूण 1.34 अब्ज लोकांनी मद्यपान केल्याचे अभ्यासात पुढे म्हटले आहे. त्यापैकी 59% लोक 15 ते 39 वयोगटातील होते. आणि या सर्वांना दारूच्या सेवनामुळे कोणत्या ना कोणत्या आजाराला सामोरे जावे लागत आहे.