Amla Hair Packs : केसांच्या समस्यांमुळे त्रस्त आहात? आवळा आहे मदतीला! बनवा ‘हे’ हेअर पॅक

Amla Hair Packs : आवळा हा आरोग्यासाठी अतिशय फायदेशीर मानला जातो. केसांसाठी आणि त्वचेसाठी आवळा सुपरफूड म्हणून ओळखला जातो. आवळ्यामध्ये अनेक प्रकारचे पोषक घटक उपलब्ध आहेत. आवळ्यामध्ये भरपूर प्रमाणात अ‍ॅंटीऑक्सिडंट्स असतात.

आवळा हा चवीला तुरट आणि आंबट असला तरी त्याचे शरिराला होणारे फायदे भरपूर आहेत. हे विसरून चालणार नाही. आवळ्यामध्ये व्हिटॅमिन क आणि टॅनिन या पोषणतत्वांचा प्रामुख्याने समावेश होतो.

आवळ्याचे केसांना होणारे फायदे सगळ्यांनाच माहित आहे. या आवळ्यापासून बनवल्या जाणाऱ्या २ हेअर पॅकबद्दल आपण जाणून घेऊयात.

आवळा-मध हेअर पॅक

आवळ्याचे बहुगुणी गुण आपल्याला माहित आहेत. आवळ्याप्रमाणेच मध देखील अनेक गुणांनी समृद्ध आहे. जर हे दोन्ही घटक एकत्र आले तर त्याचा केसांना किती फायदा होईल ना. मधामुळे चेहऱ्याला आणि केसांना एक प्रकारची चमक येण्यास मदत मिळते. निस्तेज केसांना चमकदार बनवण्याचे काम मध करते.

असा बनवा हेअर पॅक

• २ मोठे चमचे आवळ्याची पावडर घ्या किंवा आवळ्याची बारीक पेस्ट करून घ्या.

• या पावडरमध्ये किंवा पेस्टमध्ये २ चमचे मध घाला.

• आता हे मिश्रण चांगल्या प्रकारे एकत्र करा, तुमचा हेअर पॅक तयार.

• हा हेअर पॅक केसांच्या मुळांना लावून केस २० मिनिटे तसेच ठेवा.

• नंतर केस धुवून टाका.

आवळा-कढीपत्ता हेअर पॅक  

कढीपत्ता नसेल तर आपल्या जेवणाला काहीच चव राहणार नाही. हे आपल्याला मान्य करावचं लागेल. मात्र, स्वयंपाका व्यतिरिक्त कढीपत्ता केसांसाठी अतिशय लाभदायी आहे. कढीपत्त्यामध्ये भरपूर प्रमाणात फायबर्स असतात. आवळा आणि कढीपत्त्याचा एकत्रितपणे हेअर पॅक केला तर तो पातळ केसांची समस्या दूर करण्यास मदत करतो.

असा बनवा हेअर पॅक

• १०-१२ आवळ्यांचे बारीक तुकडे करून घ्या.

• या तुकड्यांमध्ये कढीपत्त्याची काही पाने एकत्र करा.

• आता हे दोन्ही घटक चांगल्याप्रकारे मिक्सरला बारीक करा.

• ही बारीक पेस्ट तुमच्या स्काल्पला लावा.

• १-२ तासांसाठी केस असेच ठेवा.

• त्यानंतर, शॅम्पूने केस धुवून टाका.