World Heart Care 2024: पूर्ण झोप अन् ध्यानाने टाळा हृदयविकार, वाचा तज्ज्ञ काय सांगतात

World Heart Day 2024: मागील काही वर्षांत हृदयविकाराच्या रुग्णात झपाट्याने वाढ होत आहे. विशेषत: बाह्य रुग्ण विभागात येणाऱ्या रुग्णांपैकी सुमारे ४० टक्के हे तरुण असतात. परंतु, योग्य आहार, व्यायाम, ध्यानधारणा आणि योगाने हृदयविकाराचा धोका टाळता येणे शक्य असल्याचे मत तज्ज्ञांनी व्यक्त केले.

मागील काही वर्षांत माणसाची बदललेली जीवनशैली, ताणतणाव, व्यसनांचे वाढते प्रमाण, व्यायामाचा अभाव, फास्ट फूड, जंक फूडच्या सेवनाचे वाढते प्रमाण, यामुळे हृदयविकाराचे रुग्ण वाढत आहेत. एखाद्या रुग्णालयाच्या ओपीडीमध्ये हृदयविकाराने ग्रस्त शंभर रुग्ण येत असतील तर यापैकी ४० रुग्ण हे तरुण असतात. म्हणजेच ४५ वर्षांपेक्षा कमी वयाचे असतात, असे तज्ज्ञांचे निरीक्षण आहे. परंतु, जीवनशैलीत बदल करून फास्ट फूड, जंक फूडचे सेवन टाळत, ताणतणाव कमी करण्यासाठी योगा, ध्यानधारणा, व्यवस्थित झोप, योग्य व्यायाम विशेषत: ३० ते ४५ मिनिटे रोज स्वतःसाठी दिल्यास हृदयविकार टाळता येणे शक्य आहे.

ध्यान ठरते महत्त्वाचे

आजच्या धावपळीच्या जीवनात ताणतणाव हा माणसाच्या आयुष्याचा घटक बनला आहे. हा ताणतणाव दूर ठेवण्यासाठी नियमित ध्यान करणे महत्त्वाचे ठरते. मग तुम्ही ध्यान करा किंवा विपश्यना याने ताणतणाव कमी करण्यास मदत होते. हृदयालाही याचा लाभ होतो.

बदललेली जीवनशैली, ताणतणाव, फास्ट फूड, जंक फूडचे सेवन या कारणाने हृदयविकाराचे रुग्ण वाढत आहेत. अशा त्रास असणाऱ्या एकूण रुग्णांपैकी सुमारे ४० टक्के तरुण असल्याचे निदर्शनाला येते. योगा, ध्यानधारणा करून ताणतणाव दूर ठेवत, पूर्ण झोप, योग्य आहार, व्यायाम केल्यास हृदयविकार टाळता येतो.

- डॉ. तुषार निकम, हृदयविकार तज्ज्ञ.

काय करू नये?

आहारात तेल, तूप, तेलकट पदार्थ, गोड पदार्थ, मीठ याचे प्रमाण कमी ठेवावे

मद्यपान, धूम्रपान करू नये.

जास्त व्यायाम टाळावा.

काय करावे

आहारात हिरव्या पालेभाज्या, सलाड वाढवावे.

कोलेस्टेरॉल, बीपी, शुगर नियंत्रणात ठेवावे.

कुठलाही त्रास नसला तरी नियमित तपासणी करावी.

रोज सहा ते आठ तास झोप घ्यावी.

रोज पायी चालणे हा सर्वोत्तम व्यायाम