Celebrity Hair Care Tips : अभिनेत्री भाग्यश्री केसांसाठी या 2 तेलांचा करते वापर, जाणून घ्या तेलाचं नाव-फायदे

Hair Care Tips : “मैंने प्यार किया” फेम अभिनेत्री भाग्यश्री आपल्या अभिनयासह सौंदर्यासाठी चाहत्यांमध्ये लोकप्रिय आहे. भाग्यश्री स्वतःच्या फिटनेसशी संबंधित काही टिप्स इंस्टाग्राम अकाऊंटद्वारे आपल्या चाहत्यांसोबत शेअर करत असते.

नुकतेच तिनं हेअर केअरशी संबंधित टिप्स सांगणारा एक व्हिडीओ शेअर केला आहे. व्हिडीओ शेअर करत तिनं आपल्या मजबूत व सुंदर केसांचे रहस्य शेअर केले आहे. चला तर जाणून घेऊया भाग्यश्री आपल्या केसांसाठी कोणत्या तेलाचा वापर करते.

भाग्यश्रीनं दिल्या हेअर केअर टिप्स 

भाग्यश्रीने सांगितले की केसांची निगा राखण्यासाठी ती नारळ व बदामाच्या तेलाचा वापर करते.  कारण या तेलांमधील पोषक तत्त्वांमुळे केस मुळासह मजबूत होतात आणि केसांवरील चमक टिकून राहते.  

बदाम आणि नारळाच्या तेलातील पोषकतत्त्व  

नारळाचे तेल आणि बदामाच्या तेलामध्ये हेल्दी फॅट्स, अँटी-फंगल, अँटी- ऑक्सिडंट्स, अँटी- बॅक्टेरिअल आणि अँटी- व्हायरल यासारखे गुणधर्म आहेत. तसंच या तेलामध्ये प्रोटीन, व्हिटॅमिन ए आणि व्हिटॅमिन ई यासारखे पोषकतत्त्वांचीही मात्रा अधिक आहे.

त्यामुळे या दोन्ही तेलांचा योग्य पद्धतीने वापर केल्यास केसांना भरपूर फायदे मिळतील. तसेच केसांना नैसर्गिक स्वरुपात मॉइश्चराइझर देखील मिळेल. ज्यामुळे कोरड्या केसांची समस्या दूर होण्यास मदत मिळेल.  

केसांसाठी हे तेल देखील वापरून पाहा

नारळाच्या तेलामध्ये कलोंजीच्या बिया मिक्स करून आपण केसांसाठी या तेलाचा वापर करू शकता. केसांशी संबंधित सर्व समस्या दूर करण्यासाठी हे तेल फायदेशीर ठरू शकते. मोहरीच्या तेलातही कलोंजीच्या बिया गरम करून आपण केसांसाठी या तेलाचा वापर करू शकता. हे तेल केसांच्या आरोग्यासाठी अतिशय लाभदायक आहे. 

नारळाचे तेल आणि मेथीच्या बिया

नारळाच्या तेलामध्ये मेथीच्या बिया मिक्स करून तेल मंद आचेवर गरम करा. यानंतर तेल थंड करून गाळून घ्या व हलक्या हाताने केसांचा मसाज करावा. या तेलाचा आठवड्यातून दोनदा वापर केल्यास केस मजबूत होतील, केसांमधील कोंडा कमी होईल. तसेच केसांवर चमक देखील वाढेल.   

डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींची पुष्टी करत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.