Long Hair Tips लांबसडक केस हवेत? किचनमधील या 3 गोष्टींचा हेअर केअर रूटीनमध्ये लगेचच करा समावेश

आपलेही केस लांबसडक, मऊ आणि सुंदर असावेत; अशी प्रत्येक तरुणीची इच्छा असते. लांबसडक केस मिळवण्यासाठी महिलावर्ग नको-नको ते उपायही करतात. पण कधी-कधी छोट्या-छोट्या गोष्टींचा वापर केल्यासही केसांवर सकारात्मक परिणाम पाहायला मिळतात. 

तुमच्या स्वयंपाकघरामध्येही असे कित्येक प्रभावी व घरगुती औषधोपचार दडलेले आहेत. पण आपण नक्कीच याकडे दुर्लक्ष करून महागड्या केमिकलयुक्त ट्रीटमेंट करत असणार, हो ना?    

स्वयंपाकघरात आढणाऱ्या काही गोष्टींचा केसांच्या वाढीकरिता वापर केल्यास केसांना मुळासकट पोषणतत्त्वांचा पुरवठा होण्यास मदत मिळेल. इतकेच नव्हे तर केस चमकदारही होतील. चला तर जाणून घेऊया घरगुती उपाय ( Effective Home Remedies For Hair Growth )

अंड्याचे हेअर मास्क

अंडे म्हणजे प्रोटीनचा सर्वोत्तम स्त्रोत. केसांच्या वाढीसाठीही प्रोटीन अतिशय आवश्यक असते. अंड्याचा योग्य पद्धतीने वापर केल्यास केसांना खोलवर पोषणतत्त्वांचा पुरवठा होतो आणि केस जाड व मऊ राहण्यासही मदत मिळते. केसांच्या वाढीसाठी आठवड्यातून एकदा अंड्याचे हेअर मास्क वापरावे. 

कसे वापरावे हेअर मास्क

एक अंडे फोडून त्यात एक चमचा ऑलिव्ह ऑइल व एक चमचा मध मिसळा. हे हेअर मास्क केसांच्या मुळांपासून ते केसांच्या शेवटच्या टोकापर्यंत लावा. 15 ते 20 मिनिटांनंतर केस सौम्य शॅम्पूने स्वच्छ धुऊन घ्यावेत. या हेअर मास्कमुळे केसांना जीवनसत्त्वे, झिंक, लोह, सेलेनियम यासारख्या पोषणतत्त्वांचा पुरवठा होतो.  

मेथी हेअर मास्क

मेथीच्या दाण्याचे हेअर मास्क वापरल्यासही केसांशी संबंधित सर्व समस्या दूर होण्यास मदत मिळेल. दोन चमचे मेथीचे दाणे रात्रभर एका भांड्यामध्ये पाण्यात भिजत ठेवा. दुसऱ्या दिवशी सकाळी मिक्सरमध्ये मेथीचे दाणे वाटून त्याची पातळी पेस्ट करून घ्यावी.

ही पेस्ट 20 मिनिटांसाठी केसांवार लावा. यानंतर केस सौम्य शॅम्पूने स्वच्छ धुऊन घ्या. मेथीतील औषधी गुणधर्मामुळे केसांचे तुटणे, केस गळणे इत्यादी समस्या कमी होतील.  

कांद्याचे हेअर मास्क

लांबसडक केस हवे असल्यास आपल्या हेअरकेअर रूटीनमध्ये कांद्याचा समावेश नक्की करावा. कांद्याचा रस काढून केसांवर लावणे फायदेशीर ठरेल. एक कांदा किसून घ्यावा. किसलेल्या कांद्यातील रस दुसऱ्या भांड्यात गाळावा. कापसाच्या मदतीने हा रस केसांच्या मुळांवर लावा व हलक्या हाताने मसाज करावा.

10 ते 15 मिनिटांनंतर केस सौम्य शॅम्पूने स्वच्छ धुऊन घ्यावेत. कांद्यातील औषधी गुणधर्म केसांच्या वाढीसाठी पोषक असतात, म्हणून कित्येक आयुर्वेदिक उपचारांमध्येही कांद्याचा वापर केला जातो.  

डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींची पुष्टी करत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.