नववधूने केला वर्ल्ड रेकॉर्ड; परिधान केला हजारो मीटर्सचा वेडिंग वेल

लग्न म्हटलं की सगळीकडे आनंद आणि उत्साहाचं वातावरण असते. कामाची लगबग, लग्नाचा मुहूर्त यामध्ये घरातील सगळी मंडळी गढून गेली असतात. तर, उपस्थित पै-पाहुण्यांचं लक्ष नववधू आणि नवरदेवाकडेच असतं. यात अनेकदा नवऱ्या मुलीने परिधान केलेल्या कपड्यांची, तिच्या दागिन्यांची चर्चा महिलावर्गात होतांना दिसते. परंतु, ही चर्चा त्या समारंभापूरती किंवा ४-५ व्यक्तींपूरतीचं मर्यादित असते. मात्र, सायप्रस येथे राहणाऱ्या एका नववधूची चर्चा त्या लग्नसोहळ्यापूरती मर्यादित न राहता संपूर्ण जगात रंगली आहे. विशेष म्हणजे या नववधूने तिच्या लग्नात थेट वर्ल्ड रेकॉर्ड केला आहे.
सायप्रस येथील मारिया परसकेवा या मुलीने तिच्या लग्नात रेकॉर्ड केला असून तिच्या या रेकॉर्डची नोंद गिनीज वर्ल्ड रेकॉर्डमध्ये (Guinness World Records) करण्यात आली आहे. मारियाने परिधान केलेल्या वेडिंग गाऊनमुळे तिचा हा रेकॉर्ड झाल्याचं समोर आलं आहे.

मारियाने लग्नात परिधान केलेल्या वेडिंग गाऊनच्या वेलची लांबी जवळपास ६ हजार,९६२.६ मीटर असल्यामुळे त्याची नोंद गिनीज वर्ल्ड रेकॉर्डमध्ये करण्यात आली आहे. विशेष म्हणजे हा जगातला सगळ्यात मोठा वेडिंग वेल आहे. ६ हजार,९६२.६ मीटर म्हणजे साधारणपणे २२ हजार ८४३ फूट आणि २.११ इंच इतका लांब तो आहे.

वेडिंग वेल सेट करायला लागले ६ तास

गिनीज वर्ल्ड रेकॉर्ड करावा ही माझी लहानपणापासूनची इच्छा होती. त्यामुळे मी ही हटके ट्रिक वापरली, असं मारिया म्हणाली. विशेष म्हणजे हा वेडिंग वेल मैदानात पसरवायला जवळपास ६ तास लागले. तसंच ३० वॉलेंटिअर्सने मिळून हा वेल मैदानात नीट पसरवला.

हेही वाचा : एक किलो भाजीची किंमत १ लाख रुपये?  जाणून घ्या नेमकं काय आहे कारण

दरम्यान, सध्या सोशल मीडियावर मारियाच्या वेडिंग वेलची चर्चा रंगली आहे. गिनीज वर्ल्ड रेकॉर्डच्या अधिकृत इन्स्टाग्राम पेजवर शेअर करण्यात आला आहे. आतापर्यंत या व्हिडीओला ४२ हजारांपेक्षा जास्त व्ह्युज मिळाले आहेत.