Chinese Dosa : घावणं, उत्तपा, आंबोळी करून वैतागला असाल तर बनवा चायनिज डोसा, रेसिपी सोपी अन् चवही झकास

Chinese Dosa :  रविवार किंवा एखाद्या स्पेशल दिवशी घरात आंबोळीची तयारी केली जाते. पीठ एकच असतं पण त्याचे प्रकार अनेक केले जातात. आंबोळी, घावणं, डोसा, आप्पे, इडली असे अनेक प्रकार या मिश्र डाळी आणि तांदुळापासून बनतात. पुर्वापार चालत आलेले हे पदार्थ आपल्या घरात सहज रूळले आहेत.

तुम्हीही घरात डोश्याचा बेत केला असेल. तर साध्या डोश्यांना चायनिज तडका द्यायला विसरू नका. मुलांना चायनिज पदार्थ आवडतात. त्यामुळेच, चायनिज डोसा कसा बनवायचा याची रेसिपी आपण पाहणार आहोत.

साहीत्य -

डोशाचे तयार पीठ, पाव किलो घट्ट कोवळा पानकोबी, २-३ गाजरे, १ भो. मिरची, १ कांदा, अर्धी वाटी मोडाचे मूग, १ टी स्पून तेल, चवीनुसार मीठ, मिरपूड

कृती :

पानकोबी वेफर्सच्या किसणीवर किसून घ्यावा. गाजर सोलून किसून घ्यावे भोपळी मिरची, कांदा पातळ, बारीक चिरावा.

१ टी स्पून तेलाची फोडणी करून त्यात कांदा, किसलेला कोबी, गाजर, भोपळी मिरची, मोडाचे मूग व चवीनुसार मीठ, मिरपूड घालून मोठ्या गॅसवर भरभर परतून घ्यावे, जास्त शिजवायचे नाही. हा डोशाचा मसाला झाला.

डोशाच्या कृतीत लिहिल्याप्रमाणे डोशाचा तवा तयार करून घ्यावा. डावाने पीठ घालून तवाभर पातळ डोसा घालावा. पाव टी स्पून तेल सोडून डोसा तव्यावरून सोडवून घ्यावा डोशाच्या मधोमध वरती तयार केलेला मसाला घालून डोशाची गुंडाळी करावी.

डोशाची गुंडाळी प्लेटमध्ये काढून त्याला ३-४ तिरके कट द्यावेत म्हणजे स्प्रिंग रोल सारखे छोटे पीस होतील व खायला सोईचे होईल. (Recipe)

महत्त्वाची टीप :

 डोशांचे वरचे कुरकुरीत कव्हर असते त्यामुळे आत सारण भरले की खूप छान लागते. पुन्हा स्प्रिंगरोलसारखे तळलेले नसल्याने सर्वांना खायला, न्याहरीला, स्नॅक्सला उत्तम प्रकार आहे.

भाज्या कच्च्या वापरायला हरकत नाही. पण थोड्या परतून घेतल्याने चांगल्या लागतात, ओलसर होतात, त्यामुळे डोशाला कट दिले तरी मसाला बाहेर येत नाही.