Post Workout Meal : वर्कआऊट केल्यानंतर थकवा आलाय? मग, 'या' खाद्यपदार्थांचे करा सेवन

Post Workout Meal : निरोगी जीवनशैलीसाठी नियमित व्यायाम करणे आणि संतुलित आहार घेणे हे महत्वाचे आहे. अनेक जण हेल्दी आणि फिट राहण्यासाठी योगा, वर्कआऊट आणि व्यायामाची मदत घेतात. काही जण जिममध्ये जाऊन इंटेन्स वर्कआऊट देखील करतात.

हे इंटेन्स वर्कआऊट केल्यानंतर अनेकांना थकवा येतो. आपले शरीर थकते. अशावेळी मग, शरीरातील ऊर्जा देखील कमी होते. ऊर्जेची ही कमतरता भरून काढण्यासाठी तुम्ही काही खाद्यपदार्थांचा आहारात समावेश करू शकता.

अशा स्थितीमध्ये हे खाद्यपदार्थ खाल्ल्यामुळे आपल्या शरीराला ऊर्जा मिळण्यास मदत होते. कोणते आहेत हे खाद्यपदार्थ? जे तुम्ही पोस्ट वर्कआऊटनंतर खाऊ शकता, चला तर मग जाणून घेऊयात.

केळी

केळ्यामध्ये मोठ्या प्रमाणात कर्बोदके आणि पोटॅशिअमचा समावेश असतो. या पोषकघटकांमुळे शरीराला भरपूर ऊर्जा मिळते. या पोषकघटकांमुळे स्नायूंच्या वेदनेची समस्या दूर होण्यास मदत होते. त्यामुळे, वर्कआऊट केल्यानंतर केळ्यांचा आहारात जरूर समावेश करा किंवा स्मूदीच्या रूपातही तुम्ही केळीचे सेवन करू शकता.

चिकन

प्रथिने आणि कॅल्शिअमचा उत्तम स्त्रोत म्हणून चिकनला ओळखले जाते. उकडलेले चिकन खाल्ल्यामुळे आपल्या शरीरातील स्नायूंना मजबूती मिळते आणि स्नायूंची समस्या दूर होण्यास मदत होते. वर्कआऊट केल्यानंतर तुम्ही उकडलेले चिकन खाऊ  शकता. यासोबतच सूप देखील पिऊ शकता. यामुळे, तुम्हाला ऊर्जा मिळण्यास मदत होईल. उकडलेले चिकन खाणे हे आपल्या आरोग्यासाठी अतिशय फायदेशीर आहे.

ओट्स

अनेक जण वजन कमी करण्यासाठी उपयुक्त असणाऱ्या ओट्सचा आहारात समावेश करतात. ओट्समध्ये कॅलरीज आणि फॅट्सचे प्रमाण कमी आढळते. त्यामुळे, वजन कमी करण्यासाठी ओट्स अतिशय उपयुक्त आहेत.

ओट्समध्ये फायबर्स आणि कार्बोहायड्रेट्सचे भरपूर प्रमाण आढळून येते. त्यामुळे, ओट्सचे सेवन केल्यानंतर आपल्या शरीराला ऊर्जा मिळण्यास मदत होते. वर्कआऊट केल्यानंतर ओट्सचे सेवन अवश्य करा. यामुळे, शरीराला ऊर्जा मिळेल आणि तुम्हाला फ्रेश वाटेल.

अंडी

प्रथिने आणि कॅल्शिअमचा प्रमुख स्त्रोत म्हणून अंडी आपल्या आरोग्यासाठी अतिशय फायदेशीर आहेत. वर्कआऊट केल्यानंतर तुम्ही उकडलेली अंडी खाऊ शकता. यामुळे, तुमच्या थकलेल्या शरीराला ऊर्जा मिळण्यास मदत होईल.