Tofu Benefits : टोफू आहे सर्वोत्तम सुपरफूड, 'या' कारणांसाठी आहारात जरूर करा समावेश

लTofu Benefits : पनीर आणि टोफूमध्ये पोषकतत्वांचा मोठ्या प्रमाणात समावेश असतो. परंतु, अनेकदा लोक पनीर आणि टोफूला एकच समजतात. प्रत्यक्षात पनीर हे दुधापासून बनवले जाते तर टोफू हे सोयापासून बनवले जाते.

पनीर आणि टोफू दिसायला जरी सारखे दिसत असले तरी त्याची चव ही वेगळी असते. पनीरमध्ये कॅल्शिअम अन् जीवनसत्वे विपुल प्रमाणात असतात तर टोफूमध्ये व्हिटॅमीन बी १ आणि अ‍ॅमिनो अ‍ॅसिड भरपूर प्रमाणात आढळते.

आरोग्यासाठी फायदेशीर असणाऱ्या टोफूचा आहारात समावेश केल्याने आपल्याला अनेक फायदे होतात. शाकाहारी लोकांच्या आरोग्यासाठी हा तर एक अतिशय उत्तम पर्याय आहे.

जर तुम्ही योग्य मसाले आणि सॉस वापरले तर तुम्ही टोफूपासून अनेक चवदार आणि पौष्टिक खाद्यपदार्थ बनवू शकता. टोफू हे सुपरफूड का आहे? आणि त्याचा आहारात समावेश केल्याने आरोग्याला कोणते फायदे होतात? चला तर मग जाणून घेऊयात.

मांसपेशींसाठी लाभदायी

टोफू हे एक संपूर्ण प्रथिने आहे. टोफूमध्ये अ‍ॅमिनो अ‍ॅसिड्स असतात, ज्यामुळे शरीराला काम करण्यासाठी भरपूर ऊर्जा मिळते. तसेच, शरीरातील स्नायूंच्या निर्मितीसाठी आणि विकासासाठी टोफू फायदेशीर ठरते. त्यामुळे, आपल्या शरीरातील स्नायूंच्या मजबूतीसाठी टोफू लाभदायी आहे.

कर्करोगाचा धोका कमी होतो

ताजी फळे, हिरव्या पालेभाज्या आणि टोफूचे सेवन केल्याने स्तनाच्या कर्करोगाचा धोका कमी करण्यास मदत होते. असे अनेक संधोधनांमधून समोर आले आहे. कर्करोगासाठी आणि इतर आजारांना दूर करण्यासाठी फायदेशीर असणाऱ्या टोफूचा आहारात जरूर समावेश करा.

पोषकतत्वांचे विपुल प्रमाण

टोफूमध्ये मॅंगनीज, फॉस्फरस आणि लोहाचे भरपूर प्रमाण आढळते. यासोबतच कॅल्शिअमचा उत्तम स्त्रोत म्हणून ही टोफूला ओळखले जाते. या सर्व पोषकतत्वांमुळे टोफू आपल्या आरोग्यासाठी फायदेशीर ठरते. टोफूचे सेवन केल्याने आपल्या शरीरातील हाडे आणि दात मजबूत होतात. यामुळे, शरीराला भरपूर ऊर्जा मिळते आणि काम करण्यास उत्साह येतो.

हृदयासाठी फायदेशीर

टोफूमध्ये फ्लेव्होनॉइड्सचे भरपूर प्रमाण आढळून येते. ज्यामुळे, उच्च रक्तदाबाची समस्या कमी होण्यास मदत होते. तसेच, हृदयाशी संबंधित इतर आजारांपासून बचाव होतो, असे ही काही संशोधनांमधून समोर आले आहे.

तसेच, टोफूमध्ये सॅच्युरेटेड फॅट्सचे विपुल प्रमाण असते. ज्यामुळे, आपल्या शरीरातील कॉलेस्ट्रॉलची पातळी नियंत्रित राहण्यास मदत होते आणि हृदयविकाराचा धोका कमी होतो. त्यामुळे, ज्या लोकांना हृदयविकाराची समस्या आहे, अशा लोकांनी त्यांच्या डॉक्टरांना विचारून आहारात टोफूचा जरूर समावेश करावा.