Healthy Breakfast : नाश्त्यासाठी याहून पौष्टीक पदार्थ शोधूनही सापडणार नाही, ज्वारीच्या पिठाचा असा करा वापर

Healthy Breakfast :

नाश्त्याला तळलेले पदार्थ सतत खाणाऱ्या लोकांमध्ये अनेक आजार वाढलेले दिसतात. तेलाने वजन तर वाढतेच पण त्यामुळे अनेक व्याधीही सुरू होतात. अशावेळी तुम्ही नाश्त्यासाठी काही आरोग्यदायी पदार्थांचा समावेश करावा. ज्यामुळे तुमचे आरोग्य अबाधित राहील.

आजकाल हेल्दी पदार्थांच्या नावाखाली अनेक पदार्थ खपवले जातात. पण तुम्ही त्या सगळ्यांपासून दूर राहून ज्वारीचा आहारात समावेश करायला हवा. जितक्या आवडीने लोक हॉटेलमध्ये मैद्यापासून बनलेल्या रोट्या खातात. तितक्या आवडीने ते भाकरी खात नाहीत. त्यामुळेच किमान सकाळचा नाश्ता या भाकरीपासून बनलेला अन् पौष्टीक असेल तर सोन्याहून पिवळं होईल.

त्यामुळेच आम्ही तुम्हाला ज्वारीच्या पिठापासून एक पौष्टीक अन् सकस नाश्ता कसा बनवायचा ते सांगणार आहोत. आजवर तुम्ही बेसनाचे धिरडे खाल्ले असतील. पण ज्वारीपासून कुरकुरीत असे धिरडे बनतात अन् ते पचनासही उत्तम असतात. त्यामुळे, ज्वारीचे धिरडे कसे बनवायचे हे पाहुयात.  

ज्वारी खाण्याचे फायदे

• ज्वारी पचायला हलकी असते. त्यामुळे नाश्ता, जेवणात ज्वारीचा समावेश करावा

• ज्वारी खाल्ल्याने पोट भरल्यासारखे वाटते

• १ कप ज्वारीमध्ये २२ ग्राम एवढे प्रोटीन असतात. त्यामुळे शरीराचे कार्य सुरळीत राहण्यास मदत होते

• ज्वारी खाल्ल्याने शरीरातील बॅड कोलेस्टेरॉल कमी होते

ज्वारीचे धिरडे बनवण्यासाठीचे साहीत्य

1. ज्वारीच पीठ १ कप

2. पाव कप तांदळाचे पीठ

3. लाल तिखट

4. धने पुड

5. धने जीरे

6. बारीक चिरलेली ढोबळी मिरची

7. बारीक चिरलेला टोमॅटो

8. हळद

9. किसलेले गाजर

10. बारीक चिरलेली कोथंबीर

11. मीठ

12. आवश्यकतेनूसार पाणी

13. लिंबू रस

कृती

• ज्वारी आणि तांदळाचे पीठ मिक्स करून घ्या. आता यामध्ये आवश्यकतेनुसार पाणी घालून धिरड्यांसाठी लागणारे पातळ पीठ बनवून घ्या

• आता या पिठात सर्व मसाले आणि भाज्या घालून घ्या

• सर्वात शेवटी कोथंबिर आणि लिंबाचा रस घालावा

• आता आंबोळीच्या तव्यामध्ये तेल सोडून घ्या. त्यावर धिरड्यांचे पीठ घालून जितके पातळ हवे त्यानुसार पसरवून घ्या

• त्यानंतर बारीक फ्लेम करून मग त्यावर झाकण ठेवावे

• थोड्यावेळाने झाकण काढून त्यावर तेल सोडावे आणि पुन्हा झाकावे