Ambani Cruise Bash : अनंत-राधिकाच्या प्री-वेडिंग सोहळ्याचा फोटोग्राफर आहे तरी कोण? एका दिवसाचे फोटो काढण्यासाठी किती घेतो मानधन?

Ambani Cruise Bash : मागील काही दिवसांपूर्वीच भारताचे प्रसिद्ध उद्योगपती मुकेश अंबानी आणि नीता अंबानींचा धाकटा मुलगा अनंत अंबानी आणि राधिका मर्चंट यांचे दुसरे प्री-वेडिंग युरोपमध्ये पार पडले. युरोपमधील एका अलिशान क्रुझवर त्यांचे हे शानदार प्री-वेडिंग सेलिब्रेशन झाले. या सोहळ्याला बॉलिवूडसहीत हॉलिवूडच्या कलाकारांनी हजेरी लावली होती.

या प्री-वेडिंगला, अनंत-राधिका आणि कुटुंबियांचे जवळचे नातेवाईक उपस्थित होते. या प्री-वेडिंग सोहळ्यानंतर अंनत-राधिकाने लग्नाची तयारी सुरू केली असून हे कपल १२ जुलैला मुंबईत विवाहबंधनात अडकणार आहेत.

या सोहळ्याचे खास क्षण छायाचित्रकार जोसेफ राधिकने त्याच्या कॅमेऱ्यामध्ये टिपले आहेत. जोसेफ राधिक हा एक सुप्रसिद्ध फोटोग्राफर आहे, जो सेलिब्रिटींच्या लग्नसोहळ्यातील फोटो त्याच्या कॅमेऱ्यात क्लिक करण्यासाठी ओळखला जातो.

अनंत आणि राधिकाच्या क्रूझवरील या प्री-वेडिंग सोहळ्याचे छायाचित्रण करण्यासाठी अंबानींनी जोसेफ राधिकची अधिकृत फोटोग्राफर म्हणून निवड केली होती. असे म्हटले जाते की, जोसेफ ‘प्रेमाचे खास क्षण’ त्याच्या कॅमेऱ्यात कैद करतो. त्याने क्लिक केलेले फोटो हे स्पेशल असतात. हा जोसेफ राधिक नेमका कोण आहे? चला तर मग जाणून घेऊयात.

जोसेफ राधिक फोटोग्राफीकडे कसा वळला?

काही लोकांना कदाचित हे माहित नसेल की, जोसेफ राधिकला सुरूवातीपासूनच छायाचित्रकार व्हायचे नव्हते. त्याने अभियांत्रिकी आणि व्यवस्थापनाचे ६ वर्षे शिक्षण घेतले आहे. तसेच, तब्बल ३ वर्षे त्याने कॉर्पोरेट जगाततही काम केले. विशेष म्हणजे सुरूवातीच्या काळात त्याने टूथपेस्ट विकण्याचे ही काम केले. यासाठी तो भारताच्या ग्रामीण भागात फिरला. त्यानंतर, त्याने मोठ्या कॉर्पोरेट हाऊसमध्ये ही काम केले.

हे काम करत असतानाच त्याच्या लक्षात आले की, त्याला कामाचा खरा आनंद हा फोटो क्लिक करण्यातून मिळतोय. त्यानंतर, २०१० मध्ये त्याने कॉर्पोरेट जगताला रामराम ठोकला आणि पूर्ण वेळ वेडिंग फोटोग्राफीमध्ये करिअर करण्यासाठी दिला. यासाठी त्याने भल्यामोठ्या पगाराची नोकरी सोडली.

फोटोग्राफीसाठी जोसेफ राधिक किती पैसे चार्ज करतो?

सेलिब्रिटींच्या लग्नात जोसेफने क्लिक केलेले फोटो सोशल मीडियावर मोठ्या प्रमाणात व्हायरल होतात. त्याने आतापर्यंत कतरिना कैफ-विकी कौशल, विराट कोहली-अनुष्का शर्मा, सिद्धार्थ मल्होत्रा-किआरा अडवाणी, केएल राहुल-अथिया शेट्टी या सेलिब्रिटींच्या लग्नात फोटोग्राफर म्हणून काम केले आहे.

जोसेफच्या फीबद्दल बोलायचे झाल्यास, तो एका दिवसासाठी तब्बल १.२५,०० ते १,५०,००० पर्यंतची फी चार्ज करतो. फोटोग्राफी व्यतिरिक्त प्रवास आणि मुक्कामाचे तो वेगळे शुल्क घेतो.