Kashmir Tourism : काश्मीरमधील डल सरोवराची निर्मिती कशी झाली, सुंदर असूनही ‘डल’असं नाव का पडलं?

Kashmir Tourism :  

आज पंतप्रधान नरेंद्र मोदी यांनी योग दिवस काश्मीरमध्ये साजरा केला. पंतप्रधान नरेंद्र मोदी यांनी निसर्गाच्या सानिध्यात योग करण्यासाठी काश्मीरमधील डल सरोवराची निवड केली होती. पण काही कारणाने त्यांना योगा एका हॉलमध्ये करावा लागला. पण मोदींच्या योगाच्या कार्यक्रमामुळे डल सरोवर मात्र चर्चेत आलं.

हे डल सरोवर अतिशय सुंदर असून त्याचे फोटो पाहूनच आपण त्याच्या प्रेमात पडतो. मात्र, त्याला हे नाव कसे पडले. आणि त्याची निर्मिती कशी झाली याबद्दल माहिती घेऊयात.

या सरोवराची निर्मिती कशी झाली

या प्रश्नाचे उत्तर म्हणून अनेक सिद्धांत मांडले जातात. एक सिद्धांत सांगतो की ही एक हिमनदी आहे जी कालांतराने सरोवरात बदलली आहे. झेलम नदीला आलेल्या भयंकर पुरामुळे डल सरोवराची निर्मिती झाली असावी असा दुसरा सिद्धांत सांगतो. मात्र, या प्रश्नाचे कोणतेही ठोस उत्तर अद्याप मिळालेले नाही.

डल सरोवर सुमारे 18 चौरस किलोमीटर क्षेत्रफळात आहे? त्याची रुंदी सुमारे 3.5 किलोमीटर आणि कमाल खोली 20 फूट आहे. डल सरोवरात बोड दल, नागीन, गगरीबल आणि लोकुत दल अशी चार खोरे आहेत. मुघल काळात बांधलेली सुंदर उद्याने या तलावाचे सौंदर्य वाढवतात.

डल असे नाव का आहे?

डल तलाव हा शब्द प्रादेशिक भाषा आणि संस्कृती दर्शवतो. काश्मिरी भाषेत ‘डल’ या शब्दाचा अर्थ तलाव असा होतो. पुढे ‘डल’ सोबत ‘तलाव’ हा स्वतंत्र शब्द सामान्य बोलण्याच्या प्रवाहात जोडला गेला, नंतर त्याला ‘डल तलाव’ असे म्हणण्यास सुरूवात झाली.

डल सरोवराला काश्मीरच्या मुकुटातील रत्न किंवा श्रीनगरचे रत्न असेही म्हणतात. जुलै-ऑगस्ट महिन्यात येथील उद्यानांचे सौंदर्य पाहण्यासारखे असते.

डल सरोवर कशासाठी प्रसिद्ध आहे?

मत्स्यपालन आणि जलसंचयनाचा हा एक महत्त्वाचा स्रोत आहे. पर्यटनाव्यतिरिक्त मासेमारी हा येथील दुसरा मोठा व्यवसाय आहे. यामुळे स्थानिक लोकांचा उदरनिर्वाह चालतो.

जर तुम्ही डल सरोवराला भेट दिली, तर नक्कीच हाऊसबोटीवर बसून शिकारा करण्याचा आनंद घ्या. पर्यटनाच्या दृष्टिकोनातून डल  सरोवरातील इतर महत्त्वाची ठिकाणे म्हणजे शालिमार बाग आणि निशात बाग होय. येथे गोड पाण्याचा धबधबा आणि उद्यान ही येथील प्रेक्षणीय स्थळे आहेत.