‘लाडकी बहीण’

राज्यातील महिलांच्या आर्थिक स्वातंत्र्यासाठी; त्यांच्या आरोग्य आणि पोषणामध्ये सुधारणा करणे आणि कुटुंबातील त्यांची निर्णायक भूमिका मजबूत करण्यासाठी राज्यात ‘मुख्यमंत्री-माझी लाडकी बहीण’ योजना सुरू करण्यात आली आहे. मध्य प्रदेशच्या धर्तीवर महाराष्ट्रातही ही योजना सुरू करण्यात आली आहे. राज्यातील महिला-मुलींना पुरेशा सोयी-सुविधा उपलब्ध करून रोजगारनिर्मितीस चालना देणे, त्यांचे आर्थिक-सामाजिक पुनर्वसन करणे, महिलांच्या सशक्तीकरणास चालना देणे; तसेच महिला आणि त्यांच्यावर अवलंबून असलेल्या मुलांच्या आरोग्य आणि पोषण स्थितीत सुधारणा करणे, या उद्देशाने ही योजना सुरू करण्यात आली आहे. २१ ते ६५ वर्ष वयोगटातील विवाहित, विधवा, घटस्फोटित, परित्यक्त्या आणि निराधार महिला योजनेच्या लाभार्थी आहेत.

पात्रता कालावधीदरम्यान प्रत्येक पात्र महिलेला तिच्या स्वत:च्या आधार लिंक केलेल्या थेट लाभ हस्तांतर सक्षम बॅक खात्यात दरमहा दीड हजार रुपये इतकी रक्कम दिली जाईल. तसेच केंद्र/राज्य सरकारच्या अन्य आर्थिक लाभाच्या योजनेद्वारे दीड हजार रुपयांपेक्षा कमी लाभ घेत असले तर फरकाची रक्कम या योजनेद्वारे पात्र महिलेस देण्यात येईल.

लाभार्थ्यांसाठी पात्रता

• लाभार्थी महिला महाराष्ट्र राज्याची रहिवासी असणे आवश्यक

• किमान वयाची २१ वर्षे पूर्ण व कमाल वयाची ६५ वर्षे पूर्ण असावीत

• लाभार्थी कुटुंबाचे वार्षिक उत्पन्न अडीच लाख रुपयांपेक्षा जास्त नसावे

• आवश्यक कागदपत्रे

• आधार कार्ड, महाराष्ट्र राज्याचे अधिवास प्रमाणपत्र, जन्म दाखला

• सक्षम प्राधिकाऱ्यांनी दिलेला कुटुंब प्रमुखांचा उत्पन्नाचा दाखला

• बॅंक खाते पासबुकच्या पहिल्या पानाची छायांकित प्रत

• पासपोर्ट आकाराचे छायाचित्र, रेशनकार्ड

अर्जांसाठीची प्रक्रिया

• अर्ज पोर्टल, मोबाईल ॲपद्वारे, सेतू सुविधा केंद्राद्वारे ऑनलाइन भरावेत

• अर्ज भरण्याची सुविधा अंगणवाडी, बाल विकास प्रकल्प अधिकारी कार्यालये, नागरी/ग्रामीण/आदिवासी/ग्रामपंचायत/वॉर्ड/सेतू सुविधा केंद्र येथे उपलब्ध

अर्ज प्रक्रिया विनामूल्य

• अर्जदार महिला अर्ज करताना उपस्थित असणे आवश्यक, जेणेकरून तिचा थेट फोटो काढता येईल

• अर्ज प्राप्त झाल्यानंतर पात्र अर्जदारांची तात्पुरती यादी पोर्टल/ॲपवर जाहीर केली जाईल. त्याची प्रत अंगणवाडी केंद्र/ग्रामपंचायत, वॉर्ड स्तरावरील सूचना फलकावर लावण्यात येईल.

(शब्दांकन : मीनाक्षी गुरव)

अंमलबजावणीचा कालावधी

तपशील कालावधी

अर्ज प्राप्त करण्यास सुरुवात : १ जुलैपासून

अर्ज प्राप्त करण्याची मुदत : ३१ ऑगस्ट