Nail Biting Effects :  नखं खाण्याची सवय महागात पडेल,आत्ताच बंद करा नाहीतर आरोग्याच्या तक्रारींचा येईल महापूर

Nail Biting Effects : काही टेन्शन असेल, एखादा इंटरव्ह्युव होणार असेल तर अशावेळी लोक बैचेन असतात. कारण, त्यांच्या मनात भिती, शंका-कुशंका यांनी घर केलेलं असतं. पण, अशावेळी ते एक कृती नेहमी करत असतात. ती म्हणजे नखं खाणे किंवा चावणे होय.

मनोसोपचार तज्ज्ञांच्या मते, जेव्हा माणूस तणावात किंवा एखाद्या गुढ विचारात असतो तेव्हा तो नखे चावतो. खरं तर, याची व्यक्तीला सवय लागते. मग अगदी थोडं जरी टेंन्शन आलं किंवा विचारात मग्न असलं तर नखं खायची सवय लागून जाते. पण ही सवय अशा लोकांच्या आरोग्यावर परिणाम करणारी ठरू शकते. (Nail Biting Side Effects )

कारण, सतत नखे चावणे तुम्हाला आजारी पाडू शकते. आपण प्रत्येक गोष्ट आपल्या हातांनी करतो. तेव्हा नखांमध्ये घाण साचते. त्या घाणीत बॅक्टेरिया निर्माण होतात. जे नखे चावल्याने नखांवाटे तोंडात जातात. त्यामुळे सतत नखे कापणे आणि हात धुण्याचा सल्ला डॉक्टर देतात.

लहान मुलं तर हाताची बोटे चोखत असतात. त्यांचे हात आणि नखांमध्ये घाण साचते. ती पोटात जासे त्यामुळे मुलांना जुलाब, पोट दुखी असे आजार होतात.  

नखं खाल्ल्याने काय होते?

सतत नखे चावत राहिल्याने शरीर अनेक रोगांचे घर बनू शकते. यामुळे, त्वचेला संसर्ग होण्याची शक्यता असते. ज्यामुळे तुमचे शरीर अनेक धोकादायक बॅक्टेरियांच्या संपर्कात येते.

नखे चावल्याने नखांचे आकार कायमचेच खराब होऊ शकतात. परंतु या व्यसनामुळे स्वच्छतेशी संबंधित समस्या तुम्हाला हानी पोहोचवू शकतात. इतकंच नाही तर तुमच्या संपर्कात येणाऱ्या लोकांसाठी ही एक मोठी समस्या असल्याचे सिद्ध होते.

यामुळे तुमचे दात तर खराब होतातच पण हिरड्यांवरही वाईट परिणाम होतो. यामुळे तुमच्या हिरड्यांना संसर्ग तर होतोच पण ते कमकुवतही होतात.

असे केल्याने नखांच्या आजूबाजूची त्वचा कोरडी पडते आणि ती निघू लागते. हे ना स्वच्छ दिसते ना आरोग्यासाठी चांगले असते.

नखे चावण्याचा थेट परिणाम पचनसंस्थेवरही होतो. ज्यामध्ये अनेक बॅक्टेरिया शरीरात प्रवेश करतात आणि पोटात जंत होण्याची समस्याही उद्भवते. लहान मुलांना याचा जास्त त्रास होतो.

ही सवय सोडवावी कशी?

कितीही तणाव आणि चिंता असली तरी त्याचे व्यवस्थापन करायला शिकले पाहिजे. तणाव दूर करण्यासाठी इतरही अनेक उपाय आहेत, ज्याचा आरोग्यावर वाईट परिणाम होत नाही.

या वाईट सवयीपासून मुक्त होण्यासाठी आपण आपल्या नखांवर काहीतरी कडू किंवा तिखट पदार्थ लावू शकता. किंवा आपल्या खिशात हात ठेवण्यास सुरुवात करू शकता.

तुम्ही तुमचे तोंड व्यस्त ठेवून या सवयीपासून मुक्त होऊ शकता. यासाठी तुम्ही च्युइंगम किंवा माउथ फ्रेशनर इत्यादी घेऊ शकता.