Rules of Yoga : योगा करतायं? मग जाणून घ्या ‘हे’ महत्वाचे नियम

Rules of Yoga : निरोगी आरोग्याची यशस्वी गुरूकिल्ली म्हणजे नियमितपणे योगासने करणे. चांगल्या आरोग्यासाठी योगा करणे हे फायदेशीर मानले जाते. विविध रोगांपासून आणि आजारांपासून दूर ठेवण्याचे काम योगा करते.

नियमितपणे योगासने केल्यामुळे आपल्या शरीराला आणि मनाला शांती मिळते. योगामुळे शरीर लवचिक होण्यास मदत मिळते. परंतु, योगा करताना काही नियम पाळले पाहिजेत. हे अनेकांना माहित नसते. आज आपण योगा करताना कोणते नियम पाळले पाहिजेत ? त्याबद्दल जाणून घेणार आहोत.

योगा करताना फॉलो करा ‘हे’ नियम

रिकाम्या पोटी करा योगा

योगा करताना तो कधीही जेवण झाल्यावर किंवा नाश्ता झाल्यावर करू नये. थोडक्यात कधी ही कोणत्या ही वेळी योगा करू नये. अन्यथा याचे तुमच्या आरोग्यावर चुकीचे परिणाम होतील.

योगासने नेहमी रिकाम्या पोटी करणे फायदेशीर असते. जर तुम्ही काही खाल्लं असेल तर त्यानंतर ३ तासांनी तुम्ही योगा करायला हवा. शक्यतो सकाळी रिकाम्या पोटी योगासने करावीत. वज्रासन हे केवळ एकमेव योगासन आहे जे जेवणानंतर करता येते.

योगा करण्याची योग्य वेळ

योगासने करण्याची योग्य वेळ ही सकाळची सांगितली जाते. सूर्योदय किंवा सूर्यास्त या दरम्यान ही योगासनांचा सराव केला जाऊ शकतो. अनेक योगातज्ज्ञ सकाळच्या वेळेत योगासने करण्याचा सल्ला देतात. दिवसभरात कोणत्याही वेळी योगासने करू नयेत. शक्यतो सकाळी किंवा सायंकाळच्या वेळेत योगा करावा.

योगा केल्यानंतर लगेच अंघोळ करू नका

अनेकांना योगा किंवा कोणताही शारीरीक व्यायाम केल्यानंतर लगेच अंघोळ करण्याची सवय असते. मात्र, असे करणे चुकीचे आहे. योगा केल्यानंतर लगेच अंघोळ करू नये.

कारण, कोणतीही शारीरीक हालचाल किंवा व्यायाम, वर्कआऊट किंवा योगा केल्यावर शरीर गरम होते. आपल्या शरीरात उष्णता निर्माण होते. त्यामुळे, अशा परिस्थितीमध्ये अंघोळ केल्यास सर्दी किंवा इतर संसर्ग होण्याची दाट शक्यता असते.

मोकळ्या हवेत करा योगा

तुम्ही ज्या जागेवर योगा करणार आहात ती जागा योगा करण्यास अनुकूल आहे का ? हे तपासून बघा. ज्या ठिकाणी मोकळी हवा आहे किंवा हवेशीर जागा आहे, अशा ठिकाणी योगा करा.

घरातील मोकळ्या जागेत किंवा झाडांच्या सानिध्यात, गार्डनमध्ये योगा करण्यावर भर द्या. जेणेकरून तुम्हाला फ्रेश आणि प्रसन्न वाटेल.