Skin Care Tips : त्वचेसाठी फायदेशीर आहे गव्हाचे पीठ, ‘या’ पद्धतीने करा वापर

Skin Care Tips : दैनंदिन जीवनात गव्हाच्या पीठासोबत आपला रोजचा संबंध येतो. गव्हाच्या पीठापासून बनवलेली चपाती आपण खातो. मात्र, तुम्हाला हे माहित आहे का की, गव्हाचे पीठ हे आपल्या आरोग्यासोबतच त्वचेसाठी देखील फायदेशीर आहे.

हो, तुम्ही वाचले ते अगदी खरे आहे. गव्हाच्या पीठाचा वापर केल्याने आपल्या त्वचेच्या अनेक समस्या दूर केल्या जाऊ शकतात. कोणताही घरगुती कार्यक्रम किंवा पार्टीसाठी तयार व्हायचे असेल तर, आता प्रत्येक वेळी पार्लरमध्ये जाण्याची गरज नाही.

तुम्ही गव्हाच्या पीठाचा चेहऱ्यावर वापर करून छान ग्लो मिळवू शकता. आज आपण गव्हाच्या पीठाचा त्वचेसाठी कसा वापर करायचा? त्याबद्दल जाणून घेणार आहोत.

गव्हाच्या पीठाचा असा करा वापर :

मृत त्वचा काढून टाकण्यासाठी

गव्हाचे पीठ चेहऱ्यावर रगडल्याने त्वचेतील मृत त्वचा किंवा ज्याला आपण डेड सेल्स म्हणतो ते निघून जाण्यास मदत होते. ही मृत त्वचा चेहऱ्यावर साचून राहिल्यानेच त्वचेवर पिंपल्सची समस्या निर्माण होते.

त्यामुळे, ही मृत त्वचा घालवण्यासाठी गव्हाच्या पीठाचा वापर करा. त्यासाठी, गव्हाचे पीठ चेहऱ्यावर गोलाकार पद्धतीने रगडा आणि ही डेड स्किन काढून टाका.

चेहऱ्यावरील डाग घालवण्यासाठी

चेहऱ्यावर येणारे मुरूम आणि काळे डाग घालवण्यासाठी गव्हाच्या पीठाचा जरूर वापर करा. यासाठी २ चमचे गव्हाचे पीठ घ्या. आता त्यामध्ये दुधाची साय आणि चिमूटभर हळद मिसळा.

आता हे मिश्रण चेहऱ्यावर २०-२५ मिनिटांसाठी लावा. त्यानंतर, चेहरा स्वच्छ पाण्याने धुवून टाका. हा उपाय केल्याने चेहऱ्यावरील डागांची समस्या दूर होण्यास मदत होईल.

अतिरिक्त तेलाची समस्या दूर करण्यासाठी

चेहऱ्यावर दिसणारे अतिरिक्त तेल काढून टाकण्यासाठी गव्हाचे पीठ फायदेशीर आहे. हे अतिरिक्त तेल काढून टाकण्यासाठी ५ चमचे गव्हाचे पीठ घ्या. या पीठात आता १ चमचा मध, २ चमचे दूध आणि २-३ थेंब गुलाबजल मिसळा.

आता हे मिश्रण चांगल्या प्रकारे एकत्र करून चेहऱ्यावर लावा. बोटांच्या मदतीने गोलाकार आकारात मसाज करा. मसाज केल्यानंतर हे मिश्रण चेहऱ्यावर तसेच राहूद्या. हे मिश्रण कोरडे झाल्यानंतर १५-२० मिनिटांनी चेहरा धुवून टाका. यामुळे, अतिरिक्त तेलाची समस्या निघून जाण्यास मदत होईल, आणि चेहरा फ्रेश दिसेल.