Travel Diaries : ट्रेकिंगची आवड आहे? मग, भारतातील ‘या’ ठिकाणांना एकदा नक्की द्या भेट

Travel Diaries : ज्या लोकांना निसर्गाच्या सानिध्यात रहायला आवडते आणि ज्यांना साहसाची आवड आहे. अशा लोकांसाठी ट्रेकिंग हा एक सर्वोत्तम पर्याय आहे. अनेकांना ट्रेकिंग करायला प्रचंड आवडते. भारतात ट्रेकिंग प्रेमींची काही कमी नाही. ट्रेकिंग केल्याने आपला शारिरीक व्यायाम होतो. यासोबतच आयुष्याकडे पाहण्याचा एक नवा दृष्टिकोन आपल्याला मिळतो.

काही जण निसर्गसौंदर्य पाहण्यासाठी आणि ते जवळून अनुभवण्यासाठी ट्रेकिंग करतात. जर तुम्हाला ही ट्रेकिंगचा छंद असेल तर आज आम्ही तुम्हाला भारतातील काही ट्रेकिंगसाठी बेस्ट असणाऱ्या ठिकाणांबद्दल सांगणार आहोत. कोणती आहेत ही ठिकाणे? चला तर मग जाणून घेऊयात.

गोमुख तपोवन ट्रेक

उत्तराखंडच्या उत्तरकाशी जिल्ह्यात हा गोमुख तपोवन ट्रेक स्थित आहे. हे एक उत्कृष्ट ट्रेकिंग ठिकाण आहे. या ठिकाणी तुम्हाला शंभू महादेवाच्या भव्य शिवलिंगाचे शिखर पाहण्याची संधी मिळते. जर तुम्हाला हिमालय पर्वत पहायचा असेल तर, गोमुख तपोवन ट्रेक हा तुमच्यासाठी सर्वोत्तम पर्याय आहे.

व्हॅली ऑफ फ्लॉवर्स ट्रेक

उत्तराखंड राज्यातील हा प्रसिद्ध ‘व्हॅली ऑफ फ्लॉवर्स ट्रेक’ ट्रेकर्सचे आवडीचे ठिकाण आहे. देश-विदेशातील अनेक उत्साही पर्यटक आणि ट्रेकर्स या ठिकाणी भेट द्यायला येतात. या व्हॅली ऑफ फ्लॉवर्स ट्रेकचा जागतिक वारसास्थळांमध्ये समावेश करण्यात आला आहे.

त्यामुळे, या ठिकाणी देश-विदेशातील पर्यटक भेट देण्यासाठी येतात. येथील निसर्गसौंदर्य पाहणे आणि या वातावरणात ट्रेकिंग करणे हा एक अविस्मरणीय अनुभव आहे. तुम्ही जर या ठिकाणी कधी गेला नसाल तर अवश्य जा.

व्यास कुंड ट्रेक

मनालीमध्ये स्थित असलेला हा बियास कुंड ट्रेक अनेकांच्या आवडीचा आहे. ट्रेकिंगसाठी हा ट्रेक सर्वाधिक प्रसिद्ध आहे. मनालीला गेल्यानंतर अनेक जण व्यास कुंड ट्रेकला आवर्जून जातात. या व्यास कुंडच्या ट्रेकिंगला गेल्यानंतर तलाव आणि त्याच्या सभोवतालचे नयनरम्य दृश्ये आपल्याला पहायला मिळतात. हा नजारा आपण कधीच विसरू शकत नाही. या ठिकाणी ट्रेकिंगला नक्की जा.