Health Care : हिवाळ्यात अशा प्रकारे करा खडीसाखरेचा वापर, मिळतील 'हे' आरोग्यदायी फायदे

Health Care : खडीसाखर खायला अनेकांना आवडते. अनेक जण जेवण झाल्यानंतर बडीशेप खाताना सोबत खडीसाखर देखील खातात. हॉटेलमध्ये जरी तुम्ही गेलात तरी सुद्धा तिथे जेवण झाल्यानंतर बडीशेपसोबत खडीसाखर ठेवली जाते. यासोबतच, धार्मिक कार्यक्रमांमध्ये प्रसाद म्हणून खडीसाखरेचा वापर आवर्जून केला जातो.

सर्वांना आवडणारी ही खडीसाखर आपल्या आरोग्यासाठी अतिशय फायदेशीर आहे. आयुर्वेदामध्ये देखील या खडीसाखरेचे महत्व सांगण्यात आले आहे. साखरेच्या तुलनेत जरा वेगळ्या चवीच्या असलेल्या खडीसाखरेचे फायदे कोणते आहेत? ते आज आपण जाणून घेणार आहोत.

पचनक्षमतेसाठी फायदेशीर

जर तुम्हाला पोटाशी निगडीत कोणतीही समस्या असेल तर तुम्ही खडीसाखरेचा जरूर वापर करा. या पोटाच्या समस्या दूर करण्यासाठी तुम्ही खडीसाखरेचे पाणी पिऊ शकता.

यासोबतच, तुम्ही खडीसाखरेची पावडर करू शकता आणि बडीशेपसोबत ही पावडर मिक्स करून खाऊ शकता. हा उपाय केल्याने तुमच्या पोटाचे आरोग्य चांगले राहण्यास मदत होईल आणि वजन देखील नियंत्रणात येण्यास मदत होईल.

खोकला आणि सर्दीमध्ये लाभदायी

सध्या देशभरात थंडीचा कडाका वाढला आहे. या वाढत्या थंडीचा आरोग्यावर परिणाम होतो आणि सर्दी-खोकला, तापाच्या समस्या सुरू होतात. या समस्या दूर करण्यासाठी मग, अनेक प्रयत्न केले जातात.

सर्दी आणि खोकल्याची समस्या दूर करण्यासाठी तुम्ही खडीसाखर खाऊ शकता. खडीसाखरेचा वापर केल्याने सर्दी आणि खोकल्याची समस्या दूर होते. यासाठी, तुम्ही खडीसाखरेची पावडर करा आता त्यात काळीमिरी पावडर मिसळा.

त्यानंतर, त्यात थोडे तूप मिसळा आणि हे मिश्रण चांगले एकजीव करा. तुम्हाला खोकला किंवा सर्दीचा त्रास होऊ लागल्यास हळूहळू हे मिश्रण चाखा. हा उपाय केल्याने तुम्हाला आराम मिळेल.

नाकातून रक्त येत असेल तर खडीसाखरेचा वापर करा

खडीसाखर ही मूळातच थंड आहे. त्यामुळे, ताप आल्यानंतर अशा परिस्थितीमध्ये तुम्ही तुमच्या शरीराचे तापमान नियंत्रित ठेवण्यासाठी खडीसाखर खाऊ शकता. उन्हाळ्यात अनेकदा नाकातून रक्तस्त्राव येण्याची समस्या निर्माण होते.

लहान मुलांमध्ये ही समस्या मोठ्या प्रमाणात आढळते. अशावेळी तुम्ही खडीसाखर पाण्यात विरघळून त्याचे पाणी पिऊ शकता. यामुळे, तुम्हाला आराम मिळण्यास मदत होईल.