Castor Oil Hair Masks : कोरड्या आणि खराब केसांची समस्या दूर करण्यासाठी एरंडेल तेलाची घ्या मदत, बनवा ‘हे’ हेअरमास्क

Castor Oil Hair Masks : 'कॅस्टर ऑईल' ज्याला आपण मराठीत एरंडेल तेल असे म्हणतो. या एरंडेल तेलाचे आपल्या आरोग्याला अनेक फायदे होतात. या तेलामध्ये आढळून येणारे पोषकघटक आपल्या केसांसाठी देखील अतिशय फायदेशीर आहेत. या तेलामध्ये समाविष्ट असणारे अमिनो अ‍ॅसिड आपल्या त्वचेला आणि केसांना मऊ आणि चमकदार बनवण्यास मदत करतात.

आरोग्यासोबतच, त्वचा आणि केसांची काळजी घेण्यासाठी तुम्ही एरंडेल तेलाचा वापर करू शकता. एरंडेल तेलाचा वापर करून केसांना रोज मसाज केल्याने केस घनदाट आणि लांब होण्यास मदत होते.

यासोबतच केसांना एक वेगळीच चमक येते. आज आम्ही तुम्हाला केसांसाठी फायदेशीर असणाऱ्या एरंडेल तेलाच्या हेअर मास्कबद्दल सांगणार आहोत. हे हेअरमास्क केसांच्या वाढीसाठी आणि केसांना चमक मिळवून देण्यात मदत करतात. चला तर मग जाणून घेऊयात या हेअर मास्कबद्दल.

एरंडेल तेल-टी ट्री ऑईल आणि कोरफडचा हेअरमास्क

एका बाऊलमध्ये २-३ चमचे एरंडेल तेल घ्या. त्यामध्ये आता २ चमचे कोरफड जेल किंवा कोरफडचा गर मिसळा. हे मिश्रण चांगल्या प्रकारे एकत्र करून घेतल्यानंतर त्यामध्ये आता टी ट्री ऑईलचे २-३ थेंब टाका. आता हे मिश्रण २-३ मिनिटांपर्यंत चांगल्या प्रकारे मिक्स करा. तुमचा हेअरमास्क तयार आहे.

हा हेअरमास्क तुमच्या केसांना आणि टाळूला लावा. जवळपास ३०-४० मिनिटे हा हेअरमास्क केसांवर तसाच ठेवा. त्यानंतर, तुमचे केस माईल्ड शॅंम्पूच्या मदतीने धुवा. अधिक चांगल्या परिणामांसाठी आठवड्यातून किमान २ वेळा हा हेअरमास्क केसांना लावा.

एरंडेल तेल-नारळाच्या तेलाचा हेअरमास्क

एरंडेल तेलासोबतच नारळाचे तेल आपल्या केसांसाठी अतिशय उपयुक्त आहे. नारळाच्या तेलामुळे केसांमधील गुंता निघून जातो आणि केस मऊ आणि चमकदार होण्यास मदत होते. एरंडेल तेल आणि नारळाच्या तेलाचा हा हेअरमास्क बनवण्यासाठी एका बाऊलमध्ये २-३ चमचे एरंडेल तेल घ्या. या तेलामध्ये १ चमचा नारळाचे तेल मिक्स करा. आता या मिश्रणात १ चमचा मध मिसळा.

आता तुमचा हेअर मास्क तयार आहे. हा हेअर मास्क आता तुमच्या केसांना आणि स्काल्पला लावा. साधारणपणे तासभर हा हेअरमास्क केसांवर असाच राहुद्या. त्यानंतर, केस माईल्ड शॅंम्पूच्या मदतीने धुवून टाका. या हेअरमास्कमुळे तुमच्या केसांना छान चमक मिळेल आणि केस मुलायम आणि घनदाट होण्यास मदत मिळेल.